सेनाको व्यवसायिक क्षमता वृद्धि गर्न सरकारले पहल लिन्छ : प्रधानमन्त्री

काठमाडौं : प्रधानमन्त्री केपी शर्मा ओलीले नेपाली सेनाको व्यवसायिक क्षमता वृद्धि गर्न सरकारले आवश्यक पहल लिने बताएका छन् । सेना दिवसको अवसरमा आज एक शुभकामना सन्देश दिंदै प्रधानमन्त्री ओलीले सो कुरा उल्लेख गरेका हुन्।

राष्ट्रिय सुरक्षा र प्रतिरक्षाको गहनतम् जिम्मेवारी बहन गरिरहेको नेपाली सेना सरकारको महत्वपूर्ण अंग रहेको बताउँदै प्रधानमन्त्रीले सन्देशमा भनेका छन्, 'यो राष्ट्रिय लक्ष्य हासिल गर्न सेना उल्लेखनीय भूमिका निर्वाह गर्नेछ भन्नेमा म विश्वस्त छु ।'

प्रधानमन्त्री ओलीले देश समृद्ध नेपाल,सुखी नेपालीको राष्ट्रिय लक्ष्यका साथ अघि बढिरहेकोले सेनाले पनि त्यसै मर्म अनुसार काम गर्न अग्रसर हुनुपर्ने सन्देशमा उल्लेख गरेका छन् । 'नेपाल निर्माणसम्मको यात्रामा नेपाली सेनाले निर्वाह गरेको भूमिका र पुर्‍याएको योगदान इतिहासको स्वर्णीम पानामा अंकित भइरहनेछ' प्रधानमन्त्री ओलीले सन्देशमा भनेका छन्, 'सेना दिवस सम्पूर्ण नेपाली र राष्ट्रकै दिवस हो भन्ने मलाई लाग्दछ । सेना दिवसको यस सुखद् अवसरमा म नेपाली सेनाका सकलदर्जाको अतुलनीय राष्ट्रभक्ति, निष्ठा र कर्तव्यपरायणताको प्रशंसा गर्दछु ।'

प्रधानमन्त्री ओलीले प्राकृतिक विपत्तिको समयमा उच्च हौसला, जोश र सेवा भावका साथ उद्दार कार्यमा खटिने सैनिकलाई धन्यवाद दिएका छन्.। नेपाली सेनाले सरकारले सुम्पिएका निर्माण कार्यलगायतका जिम्मेवारीहरु कूशलतापूर्वक सम्पन्न गर्नेमा आफु विश्वस्त भएको ओलीको सन्देशमा उल्लेख छ ।