काठमाडौं : प्रमुख प्रतिपक्षी दल नेपाली कांग्रेसका नेता तथा छाया सरकारका परराष्ट्रमन्त्री नारायण खड्काले सांसदहरुलाई छुट्याइएको ६ करोड रुपैयाँ स्वागतयोग्य भन्दै अझै बढाएर १० करोड पुर्याउनुपर्ने जिकिर गरे ।
‘सांसदलाई पैसा दिने कुरा ठीक छ । यो गर्नुपर्छ । सांसदलाई विकाससँग जोड्नको लागि पनि यो गर्नुपर्छ,’ नेता खड्काले भने । अमेरिका, भारतलगायत देशमा पनि यो कार्यक्रम प्रभावकारी रुपमा कार्यान्वयन भइरहेको उदाहरण दिँदै उनले यसमा कसैले विरोध गर्नुको औचित्य नभएको बताएका थिए ।
रिपोर्टर्स क्लबको एक कार्यक्रममा कांग्रेस नेता खड्काले यस्तो प्रतिक्रिया दिएका हुन् । लोकप्रियताको लागि सांसदलाई ६ करोड रकम दिने निर्णयको विरोध गर्नुको औचित्य नरहेको उनको भनाइ छ ।
उनले भनेका छन्, ‘कसैले सस्तो लोकप्रियताको नाममा यो कार्यक्रमको विरोध गर्नुको अर्थ छैन । संघीयतालाई बलियो बनाउन पनि यो आवश्यक छ ।’ नयाँ बजेटमा सामाजिक सुरक्षाको दायित्व झण्डै ७० अर्बको हाराहारीमा पुगेकोमा पनि खड्काले चिन्ता व्यक्त गरे । पूँजीगत खर्च ४५ प्रतिशतभन्दा बढि हुन नसकेकोमा खड्काले गुनासो पोखेका थिए ।
प्रतिक्रिया दिनुहोस !
