विराटनगर : ट्रान्सपोर्ट कम्पनीले ढुवानी गर्न आनाकानी गरेपछि प्रदेश १ मा औषधि अभाव हुन थालेको छ। काठमाडौं र विरगन्जबाट आउने औषधि विराटनगरबाट मात्रै अन्य जिल्लामा ढुवानी हुने भएकाले वितरणमा समस्या हुन थालेको हो।
पहिला आयात गरिएको औषधी सकिन थालेपछि वितरण गर्न समस्या भएको औषधी व्यवसायी बताउँछन्। ‘लकडाउन अघि ल्याएको औषधीले धानिरहेको थियो, त्यसपछि काठमाडौ र विरगन्जबाट एक पटक ल्याएका हौँ, तर, ट्रान्सपोर्टहरुले बाटोमा समस्या भएको भन्दै त्यसपछि ल्याउन मानेनन्’, औषधि ब्यवसायी संघ मोरङका अध्यक्ष लक्ष्मीप्रसाद तिम्सीनाले भने। औषधि ढुवानीमा प्रहरीले सहयोग नगरेको व्यावसायीको गुनासो छ।
प्रदेश १ का सबै जिल्लामा औषधि पुर्याउने ठुला व्यवसायी विराटनगरमा छन्। लकडाउन सुरु भएसँगै विराटनगर बाहेक अन्यत्र औषधि पुर्याउन समस्या भएको औषधि व्यवसायी संघका कोशी अध्यक्ष कुमार खतिवडाले बताए। ‘अहिले औषधी पुर्याउने कर्मचारीलाई प्रहरीले रोक्न थालेपछि अहिले समस्या छ’, उनले भने। चिकित्सक र बिरामीलाई नभई नहुने औषधि पनि सहज रुपमा ढुवानी हुन नसकेको खतिवडाले बताए। ‘कोरोना संक्रमणको त्रासका बावजुद चिकित्सक, स्वास्थ्यकर्मी र सुरक्षाकर्मीसँगै अग्रपंक्तिमा खटिएर सेवा दिँदा समेत हाम्रो समस्या बुझिएन’, उनले भने।
पछिल्लो समस्याबारे ध्यानाकर्षण गराउँदै व्यवसायीले प्रदेश सरकारलाई ज्ञापनपत्र समेत बुझाएका छन्। तर, अझै अवस्था सहज नभएको व्यवसायी लक्ष्मीप्रसाद तिम्सीना बताउँछन्। सरकारले गम्भीर नबन्दा आगामी दिनमा अझै समस्या जटिल हुने उनको भनाई छ। औषधी व्यवसायीको ज्ञापनपत्र बुझेका प्रदेश १ का सामाजिक विकास मन्त्री जीवन घिमिरेले समस्या सम्बोधन र सहजिकरणका लागि प्रयास भईरहेको जानकारी दिए। ‘हामि समस्या कहाँ छ पहिचान गर्दैछौँ, प्रहरीबाटै भए त्यो समस्याको समाधान आजै हुनछ, उनले भने ‘ढुवानी गर्ने व्यवसायीमा समस्या भए त्यो पनि खोज्छौँ।’
प्रतिक्रिया दिनुहोस !
