नारायणगढ मुग्लिन सडक १४ घण्टापछि खुल्यो

चितवन : पहिरोले अवरुद्ध भएको नारायणगढ मुग्लिन सडक संचालनमा आएको छ । झण्डै १४ घण्टापछि सडक संचालनमा आएको हो । इच्छाकामना गाउँपालिका ६ स्थिति चार किलोमा बुधबार बिहान सवा चार बजे खसेको  पहिरो साँझ साढे ६ बजे हटाइएको हो । 

अहिले एकतर्फी मात्रै संचालनमा ल्याइएको नारायणगढ मुग्लिन सडक आयोजनाका सूचना अधिकारी शिव खनालले जानकारी दिए  । उनका अनुसार  दुईतर्फी संचालन गर्न भने समय लाग्ने छ । 

ठूलो पहिरो खसेको कारण पहिरो हटाउन समय लागेको हो । पहिरो हटाउनका लागि  पाँच वटा डोजर प्रयोग गरिएको थियो । 

पहिरो कारण सवारी साधन बीच बाटोमै रोकिएका थिए । बाटो संचालन भएसँगै अलपत्र परेका यात्रु गन्तव्य तर्फ लागेका छन् । चार किलो नारायणगढ मुग्लिन सडकको सबैभन्दा बढी पहिरो जाने स्थान हो । 

भौगोलिक बनोट कमजोर भएको कारण पटक पटक पहिरो खस्ने समस्याले दुःख दिने गरेको छ । नारायणगढ मुग्लिन सडकको ३६ किलोमिटरको दूरीका नौ स्थानमा पहिरोको जोखिमयुक्त क्षेत्र छन् । पहिरोले बाटो अवरुद्ध हुँदा बिरामी बोकेका एम्बुलेन्स बाटोमै रोकिए । दिनभर सडकमै अल्झिएका यात्रुहरु साँझपख मात्रै गन्तव्यतर्फ लागेका छन् ।