बारपाकमा मृत्यु दर बढ्यो, जेठ लागेदेखि १२ जनाले गुमाए ज्यान, परीक्षण छैन
जेठ १३, २०७८ बिहीबार ११:५८:०
गोरखा : गोरखाको बारपाक गाउँमा कोरोनासँग मिल्दोजुल्दो रोगबाट मर्नेको संख्या दिनप्रतिदिन बढिरहेको छ । बुधबार राति मात्रै तीनजनाको मृत्यु भएको स्थानीय जीतबहादुर घलेले जानकारी दिए । एकै रातमा मृत्यु हुनेमा एक महिला र दुई पुरुष हुन् । उनीहरु सबैमा रुघाखोकी, ज्वारो तथा स्वासप्रश्वासको समस्या रहेको उनको भनाइ छ ।
यसअघि बुधबार तीन जनाको मृत्यु भएको थियो । उनीहरुमध्ये एकजना उपचारका लागि भरतपुर लैजाँदै गर्दा मृत्यु भएको हो । दुईजनाको गाउँमै मृत्यु भएको घलेले जानकारी दिए । लगालग दुई दिनमा मर्ने छजनामै रुघाखोकी, ज्वारो र स्वाशप्रश्वासको समस्या रहेको उनले बताए ।
‘वैशाखको मसान्तिमा एकजनाको मृत्यु भएको थियो । जेठ लागेपछि मात्रै १२ जना मरिसके’, घलेले भने, ‘दिनदिनै तीनचार जनाको मलामी जानु परेको छ । अवस्था डरलाग्दो भयो ।’ मृतकहरु सबैको स्थानीय परम्पराअनुसार आफन्तहरुले अन्त्यष्टि गर्ने गरेका छन् । ‘आफन्त खलक गर्दा एकजनाकै एक डेढसयभन्दा धेरै मलामी हुन्छन् । आजै तीनजनाको मलामी चार सय भन्दा धेरै छौँ’, घलेले भने, ‘दिनदिनै यस्तै भइरह्यो भने त चिहानडाँडा भरिने भयो ।’ सुविधासम्पन्न आइसोलेसनको अत्यन्तै खाँचो परेको उनले बताए ।
बारपाकमा अहिलेसम्म ४४ जनाको एण्टिजेन पोजिटिभ र पीसीआर १९ जनाको पोजिटिभ रिपोर्ट आएको छ । दुई पटकसम्म परीक्षणका लागि स्वास्थ्यकर्मीको टोली जाँदा बिरामीहरु परीक्षण गर्न नआएको गाउँपालिकाका स्वास्थ्य शाखा प्रमुख मोदराज भट्ट बताउँछन् ।
रोग फैलिएपनि बारपाकमा स्वास्थ्य सुरक्षा मापदण्ड अपनाइएको छैन । मलामीमा सय, डेढसयजना भन्दा धेरै जाने गरेका छन् । मेलापात, घाँसदाउरा गरिरहेका छन् । ‘गाउँघर यस्तै हो, काम नगरी हुँदैन । धमाधम मकै गोड्ने बेला छ । कोदो रोप्ने बेला भएको छ । काम गर्नै पर्यो’, घले भन्छन्, ‘यहाँ सरकारले विशेष पहल गरे मात्र समस्या समाधान हुनुपर्छ ।’
बारपाकको अवस्था नियन्त्रणभन्दा बाहिर पुगिसकेको बारपाक सुलीकोट गाउँपालिकाका अध्यक्ष विष्णु भट्टको भनाइ छ । आफ्नो क्षमताले भेटेजति काम गरिरहेको उनले बताए । 'बारपाकको स्थिति हाम्रो नियन्त्रणभित्र छैन । डाक्टरसहितको स्वास्थ्य टोली र सुरक्षाकर्मीको टोली यहाँ नभै भएन भनेर मैले एकहप्ताअघिदेखि नै सिडियोसाबलाई भन्दै आएको छु । प्रदेश, संघ जहाँ सक्छु पहुँच भएजति ठाउँमा भनिरहेको छु । तर सुनुवाइ नै भएको छैन ।’ पालिकाबाट दुई पटकसम्म स्वास्थ्य कर्मीको टोली पठाउँदा स्थानीयबासी परीक्षण गर्नै नमान्ने उनले बताए ।
प्रमुख जिल्ला अधिकारी शालिकग्राम पौडेलले भने परीक्षणका लागि स्थानीयबासीलाई बाहिर निकाल्न स्थानीय सरकार खटिनुपर्नेमा जोड दिन्छन् । ‘संघीयता आइसकेको अवस्थामा पालिकाको भूमिका ठूलो हुन्छ ।
सकेको व्यवस्थापन त्यहीँ गर्नू, नसके जिल्लामा पठाउनू भनिरहेको छु’, प्रजिअ पौडेलले भने, ‘जनप्रतिनिधि, राजनीतिक दलले स्थानीयबासीलाई रोग परीक्षण गर्न बाहिर निकाल्न त सक्नु भएको छैन ।’ बारपाकको समस्या समाधानका लागि आज विशेष छलफल गरेर अघि बढ्ने उनले बताए ।
प्रतिक्रिया दिनुहोस !
