गोरखा : अबिरल वर्षापछिको बाढी र पहिरोले गोरखाका गाउँबस्ती जाने पदमार्ग तथा सडक अवरुद्ध भएका छन् । दरौँदी नदीमा आएको बाढीले बारपाक सडक बगाएको छ । बारपाक सुलीकोट गाउँपालिका ४ झोलुङ्गेको पक्कीपुल खण्डको सडक बगाएको प्रहरीले जनाएको छ । कालोपत्रे गरिएको सो सडक बगाएपछि बारपाकमा सवारी साधन जान नसक्ने भएको छ ।
त्यस्तै बेनिघाट, आरुघाट, लार्के सडकको आर्खेत खण्डमा बूढीगण्डकीले सडक डुबाएको छ । बूढीगण्डकीको सतह बढेर सडक डुबाएको धार्चे गाउँपालिकाका अध्यक्ष सन्तोष गुरुङले जानकारी दिए । सो सडक अवरुद्ध हुँदा उत्तरी गोरखासँगको यातायात सम्पर्क सम्बन्ध बिच्छेद भएको छ ।
त्यस्तै उत्तरी गोरखाको मनास्लु क्षेत्र प्रवेश गर्ने ठाउँमा अनगिन्ति ठाउँमा पदमार्ग बिग्रिएको वडाअध्यक्षहरुले बताएका छन् । चुमनुब्री गाउँपालिका २ को स्याला र ल्हो बीचमा पहिरोले पदमार्ग बगाएको वडाअध्यक्ष पेम्बारेता लामाले जानकारी दिए ।
त्यस्तै ल्हो र स्यो बीचमा पनि पदमार्ग पहिरोले बगाएर अवरुद्ध भएको उनले बताए । ‘भर्जमको पारिबाट झरेको पहिरोले बुढीगण्डकी नदी १० मिनेटसम्म थुन्यो । पछि एक्कैचोटि खुल्दा नदी माथिको काठे पुल बगायो’, उनले भने ।
वडा नं. ४ को गपबाट नाम्रुङ जाने सडकखण्ड पनि पहिरोले अबरुद्ध भएको छ । सोही वडाको क्वाक, छाक जाने पदमार्ग मर्मतसम्भार गर्न नसकिने गरी पहिरिएको वडाअध्यक्ष पेमाडुण्डप लामाले बताए ।
त्यस्तै वडा नं. ५ को बुरबाट गप जाने खण्डको धेरै ठाउँमा पहिरो झरेको छ । पहिरोले धेरै ठाउँमा बाटो अवरुद्ध भएको त्यहाँ खानेपानी योजनाको सामान बोकेर यात्रा गरिरहेका केरौँजाका सोनाम गुरुङले जानकारी दिए ।
त्यस्तै धार्चे गाउँपालिकाका बिभिन्न वडाबाट गाउँपालिकाको केन्द्र माछाखोला जोड्ने सडक बिभिन्न ठाउँमा अबरुद्ध भएको छ । लप्सीबोट माछाखोला खण्डमा धेरै ठूलो पहिरो गएर स्तरोन्नति भइरहेको सडक अवरुद्ध भएको वडाअध्यक्ष तुलबहादुर गुरुङले जानकारी दिए । बारपाक लाप्राक सडकखण्ड पनि अवरुद्ध रहेको उनले बताए ।
प्रतिक्रिया दिनुहोस !
