राजविराज: सप्तरीको प्रतिनिधि सभा ३ मा नेपाली कांग्रेसका दिनेशकुमार यादव निर्वाचित भएका छन् ।
संघीय सांसदका लागि तेस्रो प्रयासमा चौधरीले ३ हजार ९२१ मतान्तरले जित हासिल गर्दै संसद प्रवेशको मौका पाएका हुन् ।
मतगणनाअनुसार यादवले २६ हजार १६६ मत प्राप्त गरी निर्वाचित भएका हुन् । निकट्तम प्रतिद्वन्द्वी नेकपा (एमाले) का ताराकान्त चौधरीले २२ हजार ३०० मत प्राप्त गरे । यस्तै तेस्रो स्थानमा रहेको जनमत पार्टीका अनिस अन्सारीले १५ हजार ११४ मत प्राप्त गरेका छन् । जम्मा १८ जना उम्मेदवार रहेको सो क्षेत्रमा ६६ हजार ८२० मत सदर भएको छ ।
गत प्रदेश सभाको निर्वाचनमा उक्त क्षेत्रबाट राजपाका चन्द्रनारायण चौधरीले र संविधानसभाको निर्वाचनमा एमालेका ताराकान्त चौधरी विजयी भएका थिए । उक्त दुबै निर्वाचनमा कांग्रेसका यादव निकटतम प्रतिद्वन्द्वी थिए ।
प्रतिनिधि सभातर्फ सप्तरी १ मा जसपाका नवलकिशोर साह विजयको नजिक पुगेका छन् । सप्तरी ४ मा कांग्रेसका तेजुलाल चौधरीले अग्रता बढाएका छन् । जसपाका साहलाई जनमत पार्टीका जयकान्त राउतले तथा कांग्रेसका चौधरीलाई जसपाका बालकिशोर यादव र जनमतका सुकदेव प्रसाद साहले पछ्याइ रहेका छन् ।
हालसम्म घोषित परिणाम अनुसार सप्तरीमा कांग्रेस र जनमत पार्टीले १/१ प्रतिनिधि सभा सदस्यमा जित हासिल गरेको छ । प्रदेश सभामा जनमत पार्टीले ४, नेपाली कांग्रेस र नेकपा (एमाले)ले १/१ सदस्यमा जित हासिल गरेको छ । बाँकी प्रदेश सभा ४ (१) मा नेकपा (एस) का गोबिन्द बहादुर न्यौपाने र ४ (२) मा स्वतन्त्रका अनिरुद्धकुमार यादवले अग्रता कायम राखेका छन् ।
न्यौपानेलाई एमालेका बालकृष्ण चौधरीले र स्वतन्त्रका यादवलाई जसपाका अभिषेक यादवले पछ्याएका छन् ।
प्रतिक्रिया दिनुहोस !
