राजविराज: बहुजन शक्ति पार्टीका अध्यक्ष एवम् पूर्व मन्त्री विश्वेन्द्र पासवान पराजित भएका छन् ।
सप्तरीको प्रतिनिधि सभा ४ मा उम्मेदवार बनेका पासवान ३ हजार १७५ मतका साथ चौथौ स्थानमा रहे । उक्त क्षेत्रमा २३ हजार ४९१ मत ल्याएर सत्ता गठबन्धनबाट नेपाली कांग्रेसका तेजुलाल चौधरी तेस्रो पटक विजयी भए ।
संविधान सभा २०७० मा पहिलो पटक निर्वाचित चौधरीले गत निर्वाचनमा कांग्रेसबाट एक्लै लड्दा २४ हजार ११३ मत ल्याएर विजय भएका थिए ।
यसअघि सप्तरी २ को प्रतिनिधि सभामा जसपा नेपालका अध्यक्ष एवम् पूर्व उपप्रधानमन्त्री उपेन्द्र यादव पराजित भएको नतिजा सार्वजनिक भएको थियो ।
बहुजन शक्ति पार्टीका सचिव रोशनकुमार पासवानका अनुसार अध्यक्ष विश्वेन्द्र पासवानलाई सिरहा–४ सँगै सप्तरी–४ र कपिलवस्तु–३ बाट पनि पार्टीले उम्मेदवारको लागि सिफारिश गरेको थियो ।
पासवान तत्कालिन जनजाति पार्टीको तर्फबाट एक्लो संविधानसभा सदस्य थिए । उनले जनसंख्या तथा वातावरण र विज्ञान तथा प्रविधिमन्त्रालय पनि सम्हालेका थिए ।
प्रतिक्रिया दिनुहोस !
