विराटनगर : भन्सार छली ल्याएको अवैध लत्ताकपडासहित मोरङ प्रहरीले चार जनालाई पक्राउ गरेको छ।
विराटनगर–१६ स्थित सीमावर्ती क्षेत्र दरैयाबाट प्रहरीले सोमबार राति करिब ९ बजे अवैध रूपमा पैठारी गरी ल्याइएको लत्ताकपडासहित चार जनालाई पक्राउ गरेको हो।
पक्राउ पर्नेमा विराटनगर–१५ बस्ने १८ वर्षीय सहवाज आलम, २० वर्षीया महरिया खातुन, ३० वर्षीया खातुन मियाँ र सुनसरीको बर्जु–३ घर भएका ३५ वर्षीय महेश साह रहेका छन्।
प्रदेश १–०४–००१ ह ०१८० नम्बरको सिटीमा लेडिज, जेन्स र बच्चाको लत्ताकपडा लगायतका सामान भन्सार छली ल्याउँदै गरेको अवस्थामा सिटीसहित उनीहरूलाई नियन्त्रणमा लिइएको मोरङ प्रहरीका प्रवक्ता डिएसपी दीपक श्रेष्ठले बताए।
उनीहरूलाई इलाका प्रहरी कार्यालय रानी र वडा प्रहरी कार्यालय विराटनगरबाट खटिएको प्रहरी टोलीले नियन्त्रणमा लिएको उनले जानकारी दिए।
बरामद गरिएको लत्ताकपडा अन्दाजी ५ लाख ५० हजार ५ सय रुपैयाँ मूल्य बराबरको रहेको मोरङ प्रहरीले जनाएको छ।
प्रहरीका अनुसार बरामद गरिएको लत्ताकपडा र सिटी सफारी आवश्यक कारबाहीका लागि विराटनगर भन्सार कार्यालयमा बुझाइएको छ।
प्रतिक्रिया दिनुहोस !
