प्रेमका हत्याराहरूलाई जन्मकैद
राजविराज नगरपालिका-१ का २१ वर्षीय प्रेमको हत्या गरेको साढे चार वर्षपछि अदालतले जन्मकैदको फैसला सुनाएको छ।
राजविराज: वाइसिएल नेपाल राजविराजका सहसंयोजक प्रेमकुमार यादवको हत्या घटनामा तीन जनालाई जन्मकैदको सजाय भएको छ।
राजविराज नगरपालिका-१ का २१ वर्षीय प्रेमको हत्या गरेको साढे चार वर्षपछि अदालतले जन्मकैदको फैसला सुनाएको छ। राजविराज नगरपालिका-१२ का २५ वर्षीय मिथलेशकुमार यादव, राजविराज नगरपालिका-११ का २० वर्षीय आनन्दकुमार यादव र २९ वर्षीय जयप्रकाश यादवलाई जन्मकैदको सजाय भएको हो। राजविराज नगरपालिका-११ का १७ वर्ष १० महिना २१ दिनका किशोर र उदित भनिने बुधितनारायण यादवले सफाइ पाएका छन्।
आरोपितहरूले २०७५ असोज २३ गते विहान नौ बजे प्रेममाथि आक्रमण गरेका थिए । आक्रमणबाट घाइते प्रेमको असोज २४ गते राति उपचारका क्रममा बिराटनगरस्थित न्युरो अस्पतालमा मृत्यु भएको थियो। राजविराज नगरपालिका-२ स्थित पिस जोन बोर्डिङ्ग स्कुल अगाडि बाटोमा प्रेमलाई घेरा हाली आरोपितहरूले धारिलो हतियारले प्रहार गरी हत्या गरेको मृतकका बुवा भन्नालाल यादवले बताए।
मृतकको टोलवासी र परिवारका सदस्यहरूले राजविराजमा लाशसहित नगर परिक्रमा गर्दै जिल्ला प्रहरी कार्यालय र जिल्ला प्रशासन कार्यालय अगाडि नाराबाजी गरेका थिए। युवा समूहका बीच पटक–पटक झडप भएको र पुरानो रिसइवीका कारण प्रेमको हत्या भएको प्रहरीले जनाएको छ।
हत्या आरोपमा जिल्ला प्रहरी कार्यालयले सबैभन्दा पहिले राजविराज नगरपालिका-११ का १७ वर्षीय बालकलाई असोज २८ गते पक्राउ गर्यो। अर्का आरोपित मिथलेशलाई असोज ३१ गते पक्राउ गर्यो । जिल्ला अदालतको मङसिर ४ गतेको आदेशमा मिथिलेश पुर्पक्षका लागि राजविराज कारागारमा थुनामा छन् । पक्राउ परेका किशोर संरक्षक आमाको जिम्मामा तारेखमा रिहा भए ।
फरार रहेका राजविराज नगरपालिका-११ का २० वर्षीय आनन्दलाई प्रहरीले ०७५ मङसिर २२ गते सुनसरीको कोशी गाउँपालिका-१ लौकहीबाट पक्राउ ग¥यो । जिल्ला अदालतको आदेशले आरोपित आनन्द मङसिर २५ गतेदेखि पुर्पक्षका लागि राजविराज कारागारमा थुनामा छन् ।
जिल्ला अदालतमा हाजिर भएका जयप्रकाश ०७८ असार १६ गते चार लाख रुपियाँ धरौटी राखि पुर्पक्षका लागि रिहा भए । उच्च अदालत जनकपुर राजविराज इजलाशले ०७९ जेठ ५ गते जिल्ला अदालतको आदेश बदर गर्दै जयप्रकाशलाई थुनामा राखी पुर्पक्ष गर्न आदेश गर्यो । आदेशपछि जयप्रकाश फरार रहेको मृतकका बुवा भन्नालालले बताए।
अन्य १० जना आरोपित हालसम्म फरार रहेका छन् । उनीहरूका हकमा मुद्दा मुल्तबीमा राख्ने अन्तिम फैसला भएको छ । पक्राउ परेपछि फरार रहेकाहरूको हकमा कारवाही प्रकृया अगाडि बढने अदालतले जनाएको छ।