राजविराज : सप्तरीको शम्भुनाथ नगरपालिकाका नगर प्रमुख जितेन्द्र प्रसाद गुप्ता र इञ्जिनियर रामचन्द्र साह विरुद्ध बुधबार भ्रष्टाचार मुद्दा दर्ता भएको छ ।
अख्तियार दुरुपयोग अनुसन्धान आयोगले एक लाख ४० हजार रुपियाँ घुस लिएको भन्दै प्रमुख गुप्ता र सोही नगरपालिकाका इन्जिनियर साहविरुद्ध विशेष अदालतमा मुद्दा दायर गरेको हो ।
आयोगका प्रवक्ता भोला दाहालले बुधबार एक प्रेस विज्ञप्ति जारी गरी अनुसन्धानको सिलसिलामा नगरप्रमुख गुप्ता र इन्जिनियर साहबीचको आपसी योजना तथा मिलोमतोमा घुस रकम लिएको पुष्टि भएको दावी गरिएको छ । उहाँहरुलाई कैद र बिगोबमोजिम जरिवानाको मागदावी लिई आजै बिशेष अदालत, काठमाडौंमा आरोपपत्र दायर गरिएको प्रवक्ता दाहालले जनाउनु भएको छ ।
विद्यालय निर्माण कार्यको भुक्तानी वापत सेवाग्राहीसँग घुस मागेको सूचना र उजुरी निवेदनका आधारमा अख्तियार दुरुपयोग अनुसन्धान आयोगले इन्जिनियर साहलाई सेवाग्राहीबाट १ लाख ४० हजार घुस लिएको अवस्थामा गत माघ ३ गते घुस रकमसहित पक्राउ गरेको थियो । उनलाई कार्यकक्षबाटै अख्तियार दुरुपयोग अनुसन्धान आयोगको कार्यालय इटहरीबाट खटिएको टोलीले पक्राउ गरेको थियो ।
अनुसन्धानका क्रममा नगर प्रमुख गुप्ताको मिलोमतो समेत देखिएको भन्दै एक लाख ४० हजार रुपियाँ मागदाबीसहित भ्रष्टाचार निवारण ऐन, २०५९ को दफा ३ को उपदफा (१) र सोही दफा ३ को उपदफा (१) देहाय खण्ड (घ) बमोजिम कैद र बिगोबमोजिम जरिवाना माग गरिएको छ । विद्यालयको सभाहल निर्माणको अन्तिम बिल भुक्तानी प्रयोजनको लागि सेवाग्राहीसँग एक लाख ४० हजार रुपियाँ लिइएको आरोपपत्रमा दावी गरिएको छ ।
स्थानीय तह २०७४ को निर्वाचनमा झिनो मतअन्तरले पराजित गुप्ताले २०७९ को निर्वाचनमा ५ हजार ३९२ मत प्राप्त गरी नगर प्रमुखमा निर्वाचित हुनु भएको थियो । नेकपा एकीकृत समाजवादीतर्फबाट गुप्ता १ हजार २४९ मतान्तरले निर्वाचित हुँदा उनकै पार्टीकी अनिताकुमारी चौधरीले उपप्रमुखमा ४ हजार ९९८ मत ल्याएर विजयी हुनुभएको थियो ।
यसअघि असार २९ गते राजविराज नगरपालिकामा जसपा नेपालबाट निर्वाचित नगर प्रमुख भिमराज यादव माथि दुई लाख ६३ हजार ४ सय ६८ रुपैयाँ ४० पैसा बिगो दाबी गरी विशेष अदालतमा अख्तियार दुरुपयोग अनुसन्धान आयोगले मुद्दा दायर गरेको छ ।
गहिल कन्स्ट्रक्सनका सञ्चालक भिमराज यादवले निर्माण सेवाले आर्थिक वर्ष २०७४-२०७५ मा राजरंगशाला स्तरोन्नती कार्यको लागि जिल्ला खेलकुद विकास समिति सप्तरी र सो कन्स्ट्रक्सनबीच सम्झौता भए पनि यादवले मापदण्ड विपरीत काम गरेको अभियोग छ ।
यादवले मापदण्ड विपरीत गरेको कामलाई गुणस्तरीय युक्त र मापदण्डअनुसार काम भएको प्रमाणित स्वीकृति गराई दुई लाख ६३ हजार ४ सय ६८ रुपैयाँ ४० पैसा काम गरेको भन्दा बढी भुक्तानी लिएकोले भ्रष्टाचार निवारण ऐन २०५९ को दफा ८(४) बमोजिम कसुर गरेको पुष्टि हुन आएको हुँदा कैद र जरिवाना माग गरिएको छ ।
आयोगले भ्रष्टाचार मुद्दा दायर गरेपछि राजविराजका प्रमुख यादवपछि शम्भुनाथका प्रमुख गुप्ता निलम्बनमा परेका छन् ।
प्रतिक्रिया दिनुहोस !
