आईजिपी कुँवरले भने - प्रहरी उच्च अधिकारीहरूको बैंक खाता चेक हुँदैछ

भैरहवा : नेपाल प्रहरीका महानिरीक्षक (आईजिपी) बसन्त बहादुर कुँवरले प्रहरीका एकजना डिआईजीलाई कारवाही गर्न लागिएको बताएका छन् । पदीय मर्यादा छोडेर भ्रष्टाचार गरेको भन्दै आईजिपी कुँवरले ती डिआईजीलाई कारवाही गर्न लागिएको बताएका हुन्।

‘हामी डिआईजी साबसम्मलाई ‘क्रप्सन’मा कारवाही गर्दैछौं । तपाईं सबैले बुझ्नुपर्छ म-म नभन्नुसु,'बुधबार जिल्ला प्रहरी कार्यालय रुपन्देहीको नवनिर्मित भवनको उद्घाटन पछि कार्यक्रममा कड्किदै उनले भने,‘तपाईं परिवारको खाता चेक गर्दैछौं । तपाईंहरूको खाता चेक गर्दैछौँ । तपाईंको साथीसंगतिको खाता चेक गर्दैछौँ । अहिले एकजना डिआईजी साब फस्दै हुनुहुन्छ । त्यसैले यी कुराहरू बुझ्नुस् है बुझ्नुस् । निर्मम हुनुपर्ने अवस्था छ ।’

उनले प्रहरीलाई आचरण सुधार गर्न समेत निर्देशन दिए । ‘प्रहरीप्रति जुन किसिमको छवि छ । जुन किसिमको नकारात्मक किसिमको चित्रण छ । नागरिकको मन मस्तिष्कमा त्यो हटाउन जरुरी छ’,उनले भने,‘त्यो हटाउने भनेको हाम्रो आचारण,व्यवहारले हो । अहिले कुनै पनि कुरा छिप्ने अवस्था छैन ।’

घुमुवा प्रहरीतर्फ इंगित गर्दै उनले एउटै कार्यालयमा १०/१५ वर्षसम्म मान्छे राख्ने प्रवृत्ति गलत रहेको र नयाँ प्रहरीबाट काम गरे उक्त सेटिङ भत्किने बताए । ‘दश वर्षमा एउटै कार्यालयमा राख्न प्रवृत्ति छ । यो र त्यो भनेर तपाईं राख्नुहुन्छ । त्यो बिना काम गर्न सक्नुहुन्न । थाहा छैन के हो ?’उनले प्रश्न गर्दै भने,‘तपाईं नयाँ फ्रेसमान्छेबाट काम गर्नुस् त्यो सेटिङ भत्किन्छ ।’

लुम्बिनीमा देशविदेशबाट आउने पर्यटकसमक्ष प्रस्तुत गर्ने व्यवहारको प्रचार विश्वभर हुने गरेकाले प्रहरीले जनमैत्री,सेवामैत्री व्यवहार र व्यवसायिकता प्रर्दशन गर्न उनले निर्देशन दिए । नागरिकले प्रहरीले राम्रो गरेको महशुस गराउनुपर्ने भन्दै व्यवसायिक स्वार्थ मात्र गन्तव्य भन्ने धारणाका साथ काम गर्न आग्रह गरे ।

बुधबार महानिरीक्षक कुँवरले १४ करोड ९६ लाख १४ हजार ५ रुपैयाँ लागतमा निर्माण भएको जिल्ला प्रहरी कार्यालय रुपन्देहीको भवनको उद्घाटन गरेका छन् ।