विराटनगर : मोरङको कटहरीमा आयोजना गरिएको ४ दिने कृषि मेला आइतबार सम्पन्न भएको छ। नेपाल उद्योग वाणिज्य महासंघ कोशी प्रदेशले पहिलोपटक मेला आयोजना गरेको हो।
भदौ २७ गतेदेखि आयोजित कृषि एक्स्पोमा १ सय ३० वटा स्टल राखिएका थिए। नेपाल उद्योग वाणिज्य महासंघ कोशी प्रदेशका अध्यक्ष राजेन्द्र राउतले एक्स्पो भव्य रूपमा सम्पन्न भएको बताए। उनका अनुसार करिब १ लाख जनाले एक्स्पोको अवलोकन गरेका छन्।
एक्स्पोमा कोशी र मधेश प्रदेशका कृषक, कृषि कलेज, विभिन्न स्कुल तथा कलेजका विद्यार्थी, कृषक, कृषि विज्ञलगायत सहभागी भएका थिए। कृषि ज्ञान केन्द्र, स्थानीय तह तथा उद्योग वाणिज्य संघहरुको सिफारिसमा मात्रै ८ सय जना कृषक मेलामा सहभागी भएको राउतले बताए। जिल्ला बाहिरबाट आएका कृषक तथा विद्यार्थीलाई निःशुल्क खानबस्नको व्यवस्था मिलाइएको थियो।
एक्स्पोमा कृषि बजार प्रणाली र मूल्य श्रृंखला, ‘कस्टम हायरिङ’को प्रयोग, पशुपंक्षी कृषि विज्ञानका विषयमा प्रस्तुतीकरण भएको जानकारी उनले दिए। उनका अनुसार विज्ञहरु बीच ‘प्यानल’ छलफल पनि भएको थियो।
भारतीय विज्ञ डा. कन्चन भौमिक, कृसेन्दु सिन्हा र डा. सुभाशिष बलले कृषिमा ‘एजोला तथा ब्लुग्रीन एल्गी’को उत्पादन र प्रयोग एवं जैविक मल तथा विषादी बनाउने र यसको प्रयोग विधिका विषयमा कृषकहरुलाई जानकारी गराएका थिए। एक्स्पोमा कृषि मेसिनरी, कषि उपज, भेटनरीलगायत साना किसानहरुका उत्पादनदेखि हिमाली र पहाडी जिल्लाका उत्पादनको स्टल राखिएको जानकारी राउतले दिए।
प्रतिक्रिया दिनुहोस !
