रोहित र सादबिनको शतकीय साझेदारीले लुम्बिनीले चितवनलाई दियो १६८ रनको लक्ष्य

काठमाडौं : नेपाल प्रिमियर लिग (एनपीएल) मा नवौं दिनको पहिलो खेलमा लुम्बिनी लायन्सले चितवन राइनोजलाई १६८ रनको विजयी लक्ष्य प्रस्तुत गरेको छ। कीर्तिपुरस्थित त्रिवि क्रिकेट मैदानमा टस हारेर ब्याटिङ गरेको लुम्बिनी लायन्सले ६ विकेट गुमाउँदै १६७ रन बनाएको हो। 

पाँचौं विकेटका लागि कप्तान रोहित र साद बिन जफरले ११४ रनको शतकीय साझेदारी गरेका हुन्। लुम्बिनीका लागि कप्तान रोहित पौडेलले ८० रन बनाए। उनले ५७ बलमा ६ चौका र ५ छक्का प्रहार गर्दै ८० रन बनाए।

लुम्बिनी लायन्सले पावरप्लेमा २ विकेट गुमाउँदै ३३ रन जोड्यो। लुम्बिनीका लागि पहिलो विकेटका रुपमा २.१ ओभरमा रिजन ढकालले अशुतोष घिरौयालाई १ रनमा बोल्ड आउट गरे। दोस्रो विकेटका रुपमा २.३ ओभरमा उन्मुक चन्दको विकेट गयो। उनी डक आउट भए। 

२ ओभरको समाप्तिमा लुम्बिनी २–२ को अवस्थामा थियो। २ रन बनाउँदा २ विकेट गुमाएको लुम्बिनी ४ ओभर सकिँदा २ विकेटको क्षतिमा ८ रन बनाएको थियो। तेस्रो विकेट अर्जुन साउदको गयो। उनलाई रञ्जित कुमारले कुशल मल्लको हातमा क्याच आउट गराएका हुन्। अर्जुनले १२ बलमा १ चौका र १ छक्कासहित १५ रन बनाए। 

चौथो विकेट टम मोरिसको गयो। उनले ५ बलमा १ छक्कासहित १० रन बनाए। लुम्बिनीले १० ओभरमा ४ विकेटको क्षतिमा ५७ रन बनाएको थियो। 
१५ ओभरमा १०० रन पूरा गरेको लुम्बिनीको ब्याटिङ कप्तान रोहित र साद बिन जफरले सम्हाले। पाँचौं विकेटका लागि १८.३ ओभरमा रोहित र साद बिन जफरले शतकीय साझेदारी पूरा गरे। 

अर्का ब्याटर साद बिन जफर ५२ रन बनाउँदै अन्तिम बलमा रन आउट भए। उनले ३५ बलमा ४ चौका र १ छक्का प्रहार गरे। 
सन्दीप जोरा ३ बलमा ४ रन बनाउँदै अविजित रहे। चितवनका लागि रिजन ढकालले ३ विकेट र कुशल मल्ल र रञ्जित ढकालले समान १/१ विकेट लिए। 

लुम्बिनीले पहिलो खेलमा विराटनगरसँग २ विकेट, पोखरासँग १० विकेट, सुदुरपश्चिमसँग ४५ रन र जनकपुरसँग १ रनले पराजित भएको हो। 
चितवनले पहिलो खेलमा काठमाडौंलाई ५ विकेट, पोखरालाई ८७ रनले र चौथो खेलमा सुदूरपश्चिम रोयल्सलाई ३३ रनले जित्दा तेस्रो खेलमा कर्णाली याक्ससँग ६ विकेटको हार बेहोरेको हो।