सामुदायिक विद्यालयमा पठनपाठन सुरु गर्न गल्याङ नगरपालिकाको आग्रह

स्याङ्जा : स्याङ्जाको गल्याङ नगरपालिकाले सामुदायिक विद्यालयमा आइतबारदेखि पठनपाठन सुरु गर्न आग्रह गरेको छ । नगर कार्यपालिका र नगर शिक्षा समितिका बैठकले आइतबारदेखि सामुदायिक विद्यालयमा पठनपाठन सुरु गर्ने गराउने निर्णय गरेको हो । 

काठमाडौं केन्द्रित शिक्षकको आन्दोलनले सामुदायिक विद्यालयमा भर्ना अभियानदेखि पठनपाठन रोकिएको छ । लामो समयसम्म पठनपाठन रोकिँदा बालबालिकासहित अभिभावकमा समेत नकारात्मक प्रभाव पर्ने जनाउँदै नगरपालिकाले सूचनामार्फत विद्यालयका गतिविधि सञ्चालन गर्न आग्रह गरेको हो ।  

नगरप्रमुख गुरुप्रसाद भट्टराईले जारी गरेको सूचनामा विद्यार्थी भर्ना, कक्षा सञ्चालन, पाठ्यपुस्तक वितरण, शैक्षिक तथा प्रशासनिक कार्यहरूमा तत्काल सञ्चालन गर्न आग्रह गरिएको छ । यसअघि विरुवा र हरिनास गाउँपालिकाले विद्यालयमा  पठनपाठन सुरु गर्न आग्रह गरेका थिए ।