इरान युद्धबारे झण्डै दुई सातापछि पेन्टागनले आज ब्रिफिङ गर्दै

वासिङ्टन डीसी : पेन्टागनले इरानमा जारी युद्धको पछिल्लो अवस्थाबारे जानकारी दिन मंगलबार बिहान 'प्रेस ब्रिफिङ' गर्ने भएको छ। झण्डै दुई साताको अन्तरालपछि हुन लागेको यो पहिलो औपचारिक ब्रिफिङ हो।

अमेरिकी रक्षा सचिव पिट हेगसेथ र जोइन्ट चिफ अफ स्टाफका अध्यक्ष जनरल ड्यान केनले पूर्वीय समयअनुसार बिहान ८ बजे सम्बोधन गर्ने कार्यक्रम तय गरिएको छ। यी दुई अधिकारीले यसअघि गत मार्च १९ मा युद्ध प्रयासबारे सार्वजनिक जानकारी दिएका थिए। फेब्रुअरी २८ मा इरानमा सैन्य आक्रमण सुरु भएदेखि पेन्टागनले हालसम्म जम्मा छ पटक मात्र ब्रिफिङ गरेको छ।

मध्यपूर्वमा भएका युद्धहरूका क्रममा, विशेष गरी सुरुवाती चरणमा, अमेरिकी सैन्य अधिकारीहरूले नियमित तालिका अनुसार दैनिक रूपमा युद्धको अपडेट दिने गर्दथे। तर, वर्तमान ट्रम्प प्रशासनले भने ब्रिफिङको संख्या घटाउँदै लगेको छ। साथै, ब्रिफिङ कक्षमा दक्षिणपन्थी र ट्रम्प समर्थक सञ्चारमाध्यमका प्रतिनिधिहरूलाई बढी प्राथमिकता दिएको भन्दै आलोचना समेत भइरहेको छ।

बाइडेन प्रशासनका समयमा पेन्टागनकी उप-प्रेस सचिव रहेकी सब्रिना सिंहले युद्धकालीन ब्रिफिङको महत्त्वबारे चर्चा गर्दै भनिन्, 'ब्रिफिङले अमेरिकी जनतालाई सुसूचित गर्ने, निर्णयहरूमा पारदर्शिता ल्याउने र जवाफदेहिता सुनिश्चित गर्ने काम गर्दथ्यो।'

हाल सीएनएनमा वैश्विक मामिला टिप्पणीकारको रूपमा कार्यरत सिंहले सामाजिक सञ्जाल 'एक्स'मा लेखेकी छिन्, 'नियमित ब्रिफिङ नहुनु ठूलो घाटा हो । यसले जनतालाई उत्तरभन्दा बढी अन्योलमा छोडिदिएको छ।'