ट्रम्पले इरान युद्धबारे 'महत्त्वपूर्ण अपडेट' दिने, सैन्य अभियान अन्त्यको संकेत !
चैत १९, २०८२ बिहीबार ७:५४:११
वासिङ्टन डीसी : अमेरिकी राष्ट्रपति डोनाल्ड ट्रम्पले इरानसँगको जारी तनाव र सैन्य अभियानका सम्बन्धमा केही समयमै राष्ट्रका नाममा सम्बोधन गर्दै 'महत्त्वपूर्ण अपडेट' सार्वजनिक गर्ने तयारी गरेका छन्।
यस सम्बोधनमार्फत ट्रम्पले अमेरिकी सैन्य सफलताको फेहरिस्त प्रस्तुत गर्ने र इरानमा जारी कारबाही आगामी केही हप्ताभित्रै न्यूनीकरण वा अन्त्य हुनसक्ने भन्दै आश्वस्त पार्ने अपेक्षा गरिएको छ।
अमेरिकी सेन्ट्रल कमान्डले युद्ध सुरु भएको एक महिनामा इरानका १२,३०० भन्दा बढी स्थानमा आक्रमण गरिएको छ। ती हमलाहरूमा इरानी युद्धपोत, सैन्य कमान्ड सेन्टर र ब्यालिस्टिक मिसाइल अखडाहरूलाई ठुलो क्षति पुर्याइएको वा पूर्ण रूपमा नष्ट गरिएको दाबी गरिएको छ।
तर खाडी देशहरूमा इरानी आक्रमण अझै जारी रहेका छन्। संयुक्त अरब इमिरेट्स र कतारले मिसाइल तथा ड्रोन हमलाको प्रतिकार गरेका छन्। यस्तै, ब्रिटिस सेनाले जोर्डन, बहराइन र साइप्रस लगायतका देशहरूको हवाई क्षेत्रमा इरानका १० वटा ड्रोन खसालेको दाबी गरेको छ।
युद्धविरामको चर्चा भइरहँदा इरानी अधिकारीहरूले त्यसलाई 'निराधार' भन्दै अस्वीकार गरेका छन्। ट्रम्पको सम्बोधनअघि इरानी राष्ट्रपति मसूद पेजेश्कियानले अमेरिकी जनताका नाममा एक खुला पत्र जारी गर्दै यस युद्धलाई इरानमाथिको 'कब्जा र हमला' को संज्ञा दिएका छन्।
'अमेरिका, युरोप र खाडीका अरब छिमेकी देशका सर्वसाधारणप्रति इरानको कुनै दुर्भावना छैन,' पेजेश्कियानले पत्रमा उल्लेख गरेका छन्।
यसैबीच, राष्ट्रपति ट्रम्पको पछिल्लो अभिव्यक्तिले युरोपेली मुलुकहरूमा चिन्ता थपिदिएको छ। सहयोगी राष्ट्रहरूले अमेरिकी प्रस्तावलाई समर्थन नगरे अमेरिका सैन्य गठबन्धन 'नेटो' (NATO) बाट बाहिरिन सक्ने संकेत ट्रम्पले दिएका छन्। यसले पश्चिमी देशहरूबीचको सम्बन्धमा नयाँ तरंग पैदा गरेको छ।
प्रतिक्रिया दिनुहोस !
