ट्रम्पले किन बीचमै छाड्दिए अन्तर्वार्ता ? पत्रकारलाई भने, ‘बेवकुफ’

अमेरिका : अमेरिकी राष्ट्रपति डोनाल्ड ट्रम्पले एनबीसीसँगको एक अन्तर्वार्ताका क्रममा अचानक कुराकानी बीचमै अन्त्य गरेका छन् । कार्यक्रमकी प्रस्तोता क्रिस्टन वेल्करले ट्रम्पका विभिन्न दाबीमाथि बारम्बार प्रश्न उठाएपछि अन्तर्वार्ता तनावपूर्ण बनेको थियो ।

आइतबार प्रसारण भएको ‘मिट द प्रेस’ कार्यक्रममा ट्रम्पले क्यालिफोर्नियामा भइरहेको प्राथमिक निर्वाचन र सन् २०२० को अमेरिकी राष्ट्रपति निर्वाचन दुवै ‘धाँधलीपूर्ण’ रहेको दाबी गरेका थिए । जब वेल्करले क्यालिफोर्नियाको निर्वाचनमा धाँधली भएको दाबीको प्रमाण मागिन्, ट्रम्पले भने, ‘मलाई हेर्नु र सुन्नु मात्रै पर्याप्त छ ।’ यसमा वेल्करले प्रतिक्रिया दिँदै भनिन्, ‘त्यो प्रमाण होइन ।’ त्यसपछि ट्रम्पले सञ्चारमाध्यमलाई ‘बेइमान’ भएको आरोप लगाए र अन्तर्वार्ता टुंग्याउँदै भने, ‘माफ गर्नुहोस्, अब यहीं समाप्त गरौं । मेरो लागि धेरै भयो ।’

कुरा कहाँबाट बिग्रियो ?

पारम्परिक सञ्चारमाध्यमसँग ट्रम्पको सम्बन्ध लामो समयदेखि तनावपूर्ण रहँदै आएको छ । उनले प्रायः मिडियामाथि आफूविरुद्ध पक्षपातपूर्ण व्यवहार गरेको आरोप लगाउने गरेका छन् । यो अन्तर्वार्ता विस्कन्सिनमा किसानहरूको कार्यक्रममा एउटा गोठ (बार्न) भित्र रेकर्ड गरिएको थियो । प्राविधिक समस्या र धातुको छानामाथि परेको वर्षाको ठूलो आवाजका कारण रेकर्डिङ पटक–पटक अवरुद्ध भएको थियो ।

एनबीसीका अनुसार, ट्रम्पले अन्तर्वार्ता सुरु भएको करिब ५० मिनेटपछि बीचमै छोडेका थिए । अन्तर्वार्ताको ठूलो हिस्सा इरानसँगको तनाव र द्वन्द्वबारे केन्द्रित थियो । वेल्करका प्रश्नहरूको जवाफमा ट्रम्पले अमेरिका इरानलाई परमाणु हतियार हासिल गर्नबाट रोक्न कदम चाल्न बाध्य भएको र यो ‘अन्तहीन युद्ध’ नहुने बताएका थिए । उनले भने, ‘हामी त्यहाँ केही महिनासम्म रहनेछौं, त्यसपछि खतरा धेरै हदसम्म समाप्त हुनेछ ।’

‘एन्टि–वेपनाइजेसन फन्ड’ को चर्चा
अन्तर्वार्ता छोड्नुभन्दा करिब ६ मिनेटअघि ट्रम्प र वेल्करबीच तथाकथित ‘एन्टि–वेपनाइजेसन फन्ड’ बारे चर्चा भएको थियो । यो अहिले फिर्ता लिइएको योजना थियो, जसअन्तर्गत १.८ अर्ब अमेरिकी डलरको कोष स्थापना गर्ने प्रस्ताव गरिएको थियो । यसको उद्देश्य सरकारद्वारा आफूहरूमाथि अन्यायपूर्ण अनुसन्धान वा कारबाही भएको दाबी गर्ने व्यक्तिहरूलाई क्षतिपूर्ति उपलब्ध गराउनु थियो ।

डेमोक्र्याटिक पार्टीसँगै केही रिपब्लिकन नेताहरूले पनि यस योजनाको आलोचना गरेका थिए । उनीहरूको तर्क थियो कि यसबाट ६ जनवरी २०२१ मा अमेरिकी संसद भवन (क्यापिटल) मा भएको दंगासँग सम्बन्धित मुद्दा खेपिरहेका व्यक्तिहरूले समेत रकम पाउन सक्ने अवस्था सिर्जना हुन सक्छ ।

‘उनीहरू बेइमान छन्, ठ्याक्कै तपाईं जस्तै’
त्यसपछि कुराकानी ६ जनवरीको घटनातर्फ मोडियो । ट्रम्पले सन् २०२० को निर्वाचनमा धाँधली भएको आफ्नो पुरानो, प्रमाणविहीन दाबी दोहोर्‍याएपछि वेल्करले त्यसलाई चुनौती दिइन् । ट्रम्पले क्यालिफोर्नियाको प्राथमिक निर्वाचनको उदाहरण दिँदै भने कि चार दिन बितिसक्दा पनि परिणाम घोषणा गरिएको छैन र आरोप लगाए, ‘उनीहरू निर्वाचनमा धाँधली गरिरहेका छन् ।’

वेल्करले सोधिन्, ‘के त्यसको समर्थनमा तपाईंसँग कुनै प्रमाण छ ?’ ट्रम्पले जवाफ दिए, ‘मलाई हेर्नु र सुन्नु मात्रै पर्याप्त छ ।’ वेल्करले तुरुन्तै भनिन्, ‘तर त्यो त प्रमाण होइन ।’ क्यालिफोर्नियामा अन्तिम मतपरिणाम आउन समय लाग्नु सामान्य मानिन्छ, किनभने त्यहाँ मतगणना प्रक्रिया विस्तृत हुन्छ र हुलाकमार्फत मतदान (मेल–इन ब्यालेट) व्यापक रूपमा प्रयोग गरिन्छ ।

मेल–इन मतदान प्रणाली ट्रम्पको लामो समयदेखिको आलोचनाको विषय रहँदै आएको छ । ट्रम्पले त्यसपछि भने, ‘उनीहरू बेइमान छन्, ठ्याक्कै तपाईं जस्तै ।’ वेल्करले प्रतिवाद गर्दै भनिन्, ‘निष्पक्षताका लागि भन्नुपर्दा, म बेइमान छैन । तर, कुरा अगाडि बढाऔं ।’ ट्रम्पले जवाफ दिए, ‘कि त तपाईं बेइमान हुनुहुन्छ, होइन भने मूर्ख ।’

अन्तर्वार्ता बीचमै समाप्त
केही थप चर्को बहसपछि ट्रम्पले भने, ‘अब यहीं समाप्त गरौं। मेरो लागि धेरै भयो। धन्यवाद, डार्लिङ, तपाईंको दिन शुभ रहोस् ।’ वेल्करले अन्तर्वार्ता जारी राख्ने प्रयास गरिन्, तर ट्रम्पले रोक्दै भने, ‘म एक घण्टासम्म वर्षामा तपाईंको साथमा बसेँ। रुक–रुक गरेर परेको वर्षाबीच पनि मैले तपाईंलाई पर्याप्त समय दिएको छु ।’ उनले थपे, ‘तपाईंहरूले आफ्नो प्रेसलाई सुधार्नु पर्छ, किनभने बेइमान प्रेस भएको देश कहिल्यै महान बन्न सक्दैन ।’ त्यसपछि ट्रम्पले क्यामेरा पछाडि रहेका व्यक्तिहरूतर्फ हेर्दै भने, ‘ल, अब जाऔं’, र उठेर सेटबाट बाहिरिए ।