धर्म र आतंक
इस्लाम धर्मको महान् पर्व विश्वभरि मनाइँदै छ, परम्परागत उल्लासका साथ । तर त्यो पर्व र त्योसँग जोडिएको धर्मकै नाममा पवित्र तीर्थ मदिनासहित विभिन्न ठाउँमा आतंकवादी आक्रमण भएका छन् । अमेरिकाको फ्लोरिडास्थित अर्लान्डोको एउटा रात्रिक्लबमा भएको आक्रमण यो शृंखलाको पहिलो देखिन्छ ।
त्यसपछि काबुल इस्तानबुल विमानस्थल, ढाका, बगदाद र जेद्दामा भएका आक्रमणमा सयौँको ज्यान गएको छ । समग्र विश्व नै आतंकित भएको छ । अर्थात् अमेरिकादेखि युरोप र दक्षिण एसियासम्म आतंकवादको सिकार बन्दा विश्वको सुरक्षामा या असुरक्षाको स्थिति स्पष्ट हुन्छ ।
यसैबीच इस्लामिक राज्य (आईएसआईएस) ले अमेरिकालाई अफगानिस्तानबाट फिर्ता हुन आग्रह गरेको छ । अर्थात् अर्को शब्दमा अमेरिकाले त्यसलाई स्वीकार नगरे यस्ता विस्फोटहरूको सिलसिला जारी रहने संकेत दिएको छ । यसै सन्दर्भमा भारतीय प्रधानमन्त्री नरेन्द्र मोदीले आतंकावादलाई परिभाषित गर्न संयुक्त राष्ट्रसंघसँग आग्रह गरेका छन् ।
अवश्य पनि, आतंकवादलाई परिभाषित गर्नु जरुरी छ, तर त्योभन्दा बढी यसबारे राष्ट्रसंघसहित अमेरिका, भारतलगायतका ठूला र शक्तिशाली मुलुकहरूले आफ्ना मुलुकभित्र र बाहिर आतंकवादबारे समान धारणा र व्यवहार अपनाइनु पनि त्यत्तिकै आवश्यक छ । अन्य मुलुकमा सैनिक या अन्य किसिमका हस्तक्षेपले हिंसात्मक प्रतिरोध अपनाएका घटना इराक, अफगानिस्तान, लिबिया, श्रीलंका र नेपालमा देखा परेका छन्, कुनै न कुनै रूपमा ।
‘आतंकवाद' लाई आफ्नो स्वार्थ र सुविधाअनुसार राजनीतिक, सामरिक र भौतिक सहयोग प्रदान गरेका छन्, ठूला र शक्तिशाली मुलुकहरूले । त्यसबारे दोहोरो मान्यता राख्दा ठूला मुलुकहरूको नैतिक हैसियत कमजोर हुन्छ र आतंकवादले प्रोत्साहन पाउँछ ।
शृंखलाबद्ध आतंकवादी हमला यसपटक थप चिन्ताको विषय बनेको छ । इस्लामलगायतका धर्मावलम्बीहरू घाइते भएका छन् या ज्यान गएको छ । एकातिर भने अर्कोतिर धर्मको कुव्याख्यामा आधारित यस्ता घोर आक्रमण गर्न सानै उमेरदेखि बालकहरूलाई घृणा र हत्यालाई ‘धर्मको आदेश' का रूपमा बढाइएको छ । बालमस्तिष्कमा घृणा घुसाइँदाको नतिजा विश्वले मोल्दै छ ।
तर प्रतिशोध र घृणाको निशाना बनाएमा अमेरिका जस्ता ठूलो मुलुकहरूले सम्भवतः आफ्ना बाह्य हस्तक्षेपका नीतिहरूबारेमा समेत समीक्षा गर्नु त्यत्तिकै आवश्यक छ ।
आखिर आतंकवादलाई जसले जसले जनाए पनि त्यसबाट विश्व समुदायलाई पुग्ने खतरा या क्षति समान हुन्छ । यससँगै विश्वका अधिकांश इस्लाम मुलुक र उनका धर्मगुरुहरूले ‘आतंकवाद' लाई इस्लामले मान्यता नदिने सन्देश दिनु पनि त्यत्तिकै आवश्यक छ ।
प्रतिक्रिया दिनुहोस !
