दसैं: रोग निम्ताउँछ अस्वस्थ खानाले

खुसीको पर्व दसैं मीठो परिकार खाएर र खुवाएर मनाइन्छ । घरमात्र होइन आफन्तकहाँ पुग्दा पनि मीठो परिकारबाटै न्यानो स्वागत पाउने गरिन्छ । दसैंजस्तो पवित्र पर्वलाई खानासँग मात्र जोड्ने र शारीरिक अभ्यास अर्थात् परि श्रमबिना अत्यधिक मासु र मसलेदार खाना खाँदा दीर्घरोगी बन्ने जोखिम निम्तिएको भन्दै चिकित्सकले सचेत रहन सबैमा आग्रह गरेका छन् ।

घरमै खसी, राँगा, कुखुरालगायत काट्ने र हतारमा जथाभावी पकाएर खाने चलन पछिल्लो समय बढेको छ । बजारमा किनिने मासु पनि अस्वस्थकर छन् । घरमा पाक्ने परिकारमा हालिने अनेकौं मसला, चिल्लो र पिरोले रोग निम्त्याउने वीर अस्पतालका डा. भूपेन्द्रकुमार बस्नेतले बताए ।

उनका अनुसार दसैंका बेला खाना पनि अस्वस्थकर खाने, अल्कोहलको सेवन पनि निरन्तर गर्ने, नसुत्ने र शारीरिक अभ्यास नगर्ने प्रचलन हावी भइरहेको छ । यसले गर्दा मुटु, युरिक एसिड, ग्यास्ट्रिकलगायतको समस्या देखिन थालेको छ । चिकित्सकका अनुसार दसैंका बेला होस् या अघिपछि, खानामा ध्यान दिन सकिएन भने जीवनभर पछुताउनुको विकल्प छैन । त्यसैले हरेक दिन फलफूल, हरियो सागसब्जी, दूध दहीका साथमा मासु, भात र रोटी खानुपर्ने चिकित्सकको सुझाव छ ।

के भन्छन् विशेषज्ञ
अस्वस्थकर खानाले झाडापखाला, आउँ, मिर्गौलासम्बन्धी रोग, मधुमेह, उच्च रक्तचाप, फुड प्वाइजनिङ, बाथको समस्या आदि निम्त्याइरहेको छ ।  डा. भूपेन्द्रकुमार बस्नेत, वीर अस्पताल

रमाइलो गर्नलाई अस्वस्थकर वा हेर्दा राम्रो देखिने खाना खानैपर्छ भन्ने छैन । खानामा मात्रै दसैंलाई जोडेर मनाउने हो भने धेरै नेपाली दीर्घरोगी बन्ने खतरा छ । दीर्घरोग लागिसकेका मानिसले दसैंको बहानामा जथाभावी खाँदा रोगले च्यापेर तत्कालै अस्पताल पु्र्‍याउनुपर्ने अवस्था पनि आइलागको छ ।
डा. प्रकाशराज रेग्मी, मुटुरोग विशेषज्ञ

निरोगी बन्न अघिपछि शारीरिक अभ्यास गरेझैं दसैंमा झन् धेरै समय व्यायाम गर्नुपर्छ ।
डा. अरुणा उपे्रती, जनस्वास्थ्यविद्

दसैंको बहानामा लामो समयसम्म खाइने रातो मासु, छाला र बोसोले क्यान्सरलगायत नसर्ने रोगसमेत निम्त्याउन थालेको छ । थोरै र स्वस्थ मासु खाँदा शरीरलाई फाइदा पु¥याउँछ तर अस्वस्थकर मासुले अनेकौं रोग निम्त्याउँछ । 
डा. सन्ध्या चापागाईं, क्यान्सररोग विशेषज्ञ, वीर अस्पताल