काठमाडौं: क्षेत्रीय संगठन बिमस्टेक (बे अफ बंगाल इनिसियटिभ्स फर मल्टी सेक्टरल, टेक्निकल एन्ड इकोनोमिक कोअपरेसन) का तीन बैठक आइतबारदेखि काठमाडौंमा सुरु हुँदैछन् ।
परराष्ट्र मन्त्रालयका अनुसार मंगलबार हुने बिमस्टेकका उच्च अधिकारीको १७ औं बैठक (सिनियर अफिसियल्स मिटिङ) अघि सहसचिवस्तरीय दुईवटा बैठक आयोजना हुन लागेका हुन् । सिनियर अफिसियल्स बैठकको अध्यक्षता परराष्ट्रसचिव शंकरदास बैरागीले गर्नेछन् । बैठकले बिमस्टेकको शिखर सम्मेलन तयारीबारे छलफल गर्नेछ । नेपाल अहिले बिमस्टेकको अध्यक्ष मुलुक हो । बिमस्टेकको शिखर सम्मेलन पनि नेपालले नै आयोजना गर्नुपर्नेछ । सन् २०१७ भित्र बिमस्टेक शिखर सम्मेलन आयोजना गर्ने भनिए पनि सरकारले त्यसका लागि ठोस मिति तय गर्न सकेको छैन ।
गत साता काठमाडौंस्थित कूटनीतिक समुदायसँगको भेटमा परराष्ट्रमन्त्री डा. प्रकाशशरण महतले बिमस्टेकको स्थापना दिवस पारेर आगामी जुन ६ मा बिमस्टेक शिखर सम्मेलन आयोजना गर्न सकिने बताएका थिए । आइतबार बस्ने बिमस्टेकको स्थायी सचिवालय स्थापनासम्बन्धी सहसचिवस्तरीय ज्वाइन्ट वर्किङ ग्रुपको बैठकमा बिमस्टेकको प्रशासनिक तथा आर्थिक विषयबारे छलफल हुने भएको छ । उक्त बैठकपछि सोमबार बिमस्टेक उच्च अधिकारीको १७ औं तयारी बैठकका लागि दोस्रो बैठक हुने भएको छ ।
उक्त बैठकले सन् २०१५ र २०१६ मा बिमस्टेकले गरेका कामको प्रगति समीक्षा प्रतिवेदन तयार गरी मंगलबार बस्ने बिमस्टेकका उच्च अधिकारीको १७ औं बैठकमा पेस गर्नेछ । आइतबार र सोमबार बस्ने बैठकको अध्यक्षता परराष्ट्रका सहसचिव मणिप्रसाद भट्टराईले गर्नेछन् ।
प्रतिक्रिया दिनुहोस !
