भाँडा माझ्न पास भए विप्लव
थबाङ (रोल्पा): पार्टीको आठौं महाधिवेशन बन्दसत्रका लागि थबाङ पुगेका महासचिव नेत्रविक्रम चन्द विप्लवले आफूले खाएको जुठो थाल सफा गरे । महासचिवले साबुन लगाएर मस्को लगाएको थालीलाई मेसमा खटिएका युवाले ओल्टाई–पल्टाई हेर्थे, कतै जुठो छ कि भनेर । थालमा जुठो भए फर्काउन बेर लाउँदैनथे पनि ।
‘धन्न फर्किनुपरेन । पुनः सफा गर्नुपरेन, पास हुनुभो’, मेसमा खटिएकी थबाङकी मगरभाषी एक युवतीले खस भाषामा बोलिन् । महासचिव विप्लव पनि मुस्काए । थालीमा जुठो देखिएपछि पुनः सफा गर्न परे ‘फेल’ भएको भन्दै मेसमा हाँसोको फोहोरा नै छुट्ने गथ्र्याे । फागुन ५–१० सम्म थबाङमा सम्पन्न बन्दसत्र अवधिभर महासचिवले जुठो थाल सफा गर्दा फेल हुनुपरेन । जुठो थाली मस्काउँदै गरेको दृश्य थबाङ पुगेका पत्रकारले क्यामेरामा कैद पनि गरे ।
महासचिव चन्द र नेता खड्कबहादुर विश्वकर्माले थबाङको ठूलो गाउँको मेसमा फागुन ५ मा बिहान खाना खाएर जुठो थाली सँगसँगै सफा गर्दै थिए । दुवैजनाले थाल माझेर मेसमा बुझाए । मेसमा केहीबेरपछि हाँसोको फोहोरा छुट्यो । कारण थियो, महिला नेत्री सम्झना घर्तीमगरले सफा गरेको थाली जुठो राम्ररी नपखालिएको भन्दै मेसका युवाले फिर्ता गरिदिएछन् । ‘म त एकपटक फेल भएँ’, घर्तीमगरले भनिन्, ‘एकपटक फेल भएँ, पुनः थाली माझेपछि पास भएँ ।’
प्रत्येक घरमा हसिया–हथौडा अंकित झन्डा फराएर पार्टीले थबाङमा फेरि एकपटक ‘जनयुद्ध’को झल्को दियो ।
थबाङ पुगेका आधा दर्जन पत्रकार थाली माझेर सफल भए पनि पत्रकार दीपेश पराई विष्ट असफल हुनुपर्यो । विष्टको थाली जुठो भन्दै फिर्ता गरिएपछि हाँसो चल्यो फेरि । यस्तो दृश्य थबाङमा बन्दसत्र अवधिभर चलिरह्यो । महासचिव चन्दले मात्र होइन, थबाङ पुगेका एक हजार प्रतिनिधि पर्यवेक्षक सबैले आफूले खाएको थाली माझेर फर्किए । सयौंका थाली जुठो भनेर फर्काइए । जुठो थाली पुनः सफा गर्न फर्किने डरले सबैजसोले साबुन थालीमा डलेर बस्सरी मस्को लगाएको देखिन्थ्यो ।
बन्दसत्रका प्रतिनिधि पर्यवेक्षक र पाहुनाका लागि पाँचवटा मेस सञ्चालनमा थियो । कार्यकर्ता र थबाङी मेसमा खटिएका थिए । मेसमा भात, दाल, तरकारी थियो । कहिलेकाहीँ खसी र राँगाको मासुसमेत व्यवस्था गरिएको थियो । प्रतिनिधि पर्यवेक्षकले आफूले खाने थालसमेत घरबाट नै बोकेर ल्याएका थिए । प्रत्येकले थाली ल्याएकाले र जुठो थाली स्वयम्ले मस्काएकाले थोरै जनशक्तिले पनि मेस व्यवस्थापन सहज बनेको जिल्ला पार्टी सचिव दलबहादुर खत्रीले जनाए ।
कम्युनिस्ट पार्टीमा आस्थावान्ले ‘आफ्नो काम आफैले गर्नुपर्छ’ भन्ने मान्यताबाट थाली माझ्ने गरिएको हो । ‘जनयुद्ध’का बेला पनि तत्कालीन नेकपा माओवादीका नेता कार्यकर्ताले पनि यसरी नै जुठा भाँडा मस्काउने गर्थे । प्रधानमन्त्री पुष्पकमल दाहाल र नयाँ शक्ति पार्टीका संयोजक बाबुराम भट्टराईले पनि विगतको युद्धताका थाली माझेको गाउँलेको सम्झना छ ।
चन्द नेतृत्वको विगतको नेकपा (माओवादी) बन्दसत्रबाट अब नेपाल कम्युनिस्ट पार्टी बनेको छ । तर जुठो थाली माझ्ने लिगेसी कायमै छ । ‘ श्रमको सम्मान’ कम्युनिस्टको थेगो नै हो । आफूले खाएको थाली सफा गर्नु जायज भए पनि ‘आफ्नो सबै काम आफैले गर्ने’ भए राम्रो हुने टिप्पणी हुने गरेको छ । एकीकृत जनक्रान्तिको कार्यदिशा पारित गरेको नेपाल कम्युनिस्ट पार्टीका आगामी गतिविधि कस्ता हुन्छन् भन्ने सर्वत्र चासो छ । उक्त पार्टीले थबाङमा फेरि एकपटक ‘जनयुद्ध’को झल्को दियो, थाली माझेर र थबाङमा प्रत्येक घरका छानामा हसिया–हथौडा अंकित झन्डा फराएर ।
प्रतिक्रिया दिनुहोस !
