एमालेको अभियान हेटौंडाबाट पुनः सुरु हुँदै

हेटौँडा: सप्तरी घटनापछि स्थगित भएको नेकपा एमालेको मेची-महाकाली अभियान शुक्रबारदेखि हेटौँडाबाट सुरु हुँदैछ । सप्तरीको राजविराजमा प्रहरीको गोलीबाट मोर्चाका कार्यकर्ता मारिएपछि तीन दिनका लागि स्थगित गरिएको अभियान हेडौँडाबाट सुरु गर्न लागिएको एमाले मकवानपुरले जनाएको छ ।

सभामा सहभागी हुन करिब एक हजार अभियान टोली सदस्य बिहीबार साँझसम्म हेटौँडा आईसकेको एमाले मकवानपुरका प्रचार बिभाग प्रमुख एकलाल श्रेष्ठले बताए । उच्च सुरक्षा सतर्कता सहित अभियान सुचारु गर्न
गर्न लागिएको हो ।

उच्च सुरक्षामा रहनुपर्ने नेता बाहेक सबै नेता, कार्यकर्तालाई जनताको घरमा राखिने ब्यवस्था गरेको श्रेष्ठले जानकारी दिए । पार्टीका नेता कार्यकर्तालाई जनतको घरमा राख्दा पार्टी र जनताको सम्बन्ध सुमधुर हुने दावी गर्दै अभियान प्रचार प्रसारको लागि पर्चा, पम्प्लेट, घरदैलो अभियान गरिएको श्रेष्ठले जानकारी गराए ।

हेटौँडाको भुटनदेवी उच्च माविको चौरमा हुने जनसभामा एमाले अध्यक्ष केपी शर्मा ओली लगायतका उच्च नेताहरुले सम्बोधन गर्ने कार्यक्रम छ । सप्तरी घटनापछि हेटौँडाबाट सुरु हुन लागेकोे एमाले अभियान शान्तिपूर्ण ढंगले सफल पार्न एमालेले करीब दुई हजार स्वयं सेवक परिचालन गर्ने तयारी गरेको एमाले मकवानपुरकी अध्यक्ष मुनु सिग्देलले बताईन् ।

जनसभा कार्यक्रमलाई शान्तिपूर्ण बनाउन करिब सातसय प्रहरी परिचालन गरिने मकवानपुर प्रहरी प्रमुख एसपी बसन्तकुमार लामाले जानकारी दिए । जनसभामा छिमेकी जिल्लासमेत गरी २० हजार सहभागी हुने एमाले मकवानपुरको दावी छ । टोली २८ गते बिहान हेटौँडाबाट चितवनतर्फ लाग्ने कार्यक्रम रहेको छ ।

पूर्व निर्धारित कार्यक्रम अनुसार गत फागुन २३ गते राजबिराजपछि कञ्चनपुरमा सभा गर्ने एमालेको तयारी थियो । पूर्व निर्धारित कार्यक्रम अनुसार गोलबजार, जनकपुर, बर्दिबास, हरिपुर, गरुडा, चन्द्रनिगाहपुर र जितपुरको सभा स्थगित गरी आज हेटौँडाबाट अभियान पुनः सुरु गर्न लागेको हो ।