दुई दिनदेखि डढेलो अनियन्त्रित, बस्ती सल्किने त्रासले गाउँलेको बास जंगलमा
गोरखा : चुमनुब्री गाउँपालिका–१ सामागाउँस्थित मनास्लु बेस क्याम्पमा दुईदिनदेखि लागेको डढेलो अझै नियन्त्रित हुन सकेको छैन ।
गाउँले र स्थानीय सुरक्षाकर्मीको दुई दिनदेखि आगो निभाउने प्रयास गर्दा पनि सम्भव नभएको स्थानीय धार्के पुनेलले जानकारी दिए । ‘गाउँलेहरु हिजोदेखि सुतेका छैनन् । जंगलमै छन्’, उनले भने, ‘आज पनि दिनभर निभाउन प्रयास गरे । सकेनन् । साँझदेखि यमनङ खोलाको किनारमा भेला भएर बसेका छन् । खोला वारी पनि डढेलो आयो भने गाउँसम्म पुग्ने खतरा छ । त्यसैले डेढसय भन्दा धेरैजना गाउँले जंगलमै छन् ।’ सामागाउँमा आगो आउनसक्ने भन्दै गाउँले त्रसित भएको उनले बताए । उनका अनुसार अहिले आगो वीरेन्द्रताल आसपास फैलिरहेको छ ।
सामागाउँको एउटै बस्तीमा एकसय ३० घरधुरी छन् । सो क्षेत्र मनास्लु संरक्षण क्षेत्रभित्र पर्छ । आगालागीमा परी धेरै संरक्षित वन्यजन्तु मरेको देखिएको मनास्लु संरक्षण क्षेत्र आयोजना (एमक्याप)ले जनाएको छ । ‘पाँचवटा भन्दा धेरै कस्तुरी मृग डढेलोमा परेको हाम्रा स्टाफहरुले फेला पारेका छन्’, आयोजना प्रमुख नरेन्द्र लामाले भने, ‘अन्य घोरल, झारल, नाउरहरु पनि धेरै मरेका छन् । दुखद् घटना भयो ।’
मनास्लु बेस क्याम्प गएर फर्केका पर्यटक पथप्रदर्शक सुवास पोखरेलले जंगलमा फालेको आगोसहितको चुरोटको ठुटोबाट आगो सल्केको चुमनुब्री–१ का वडा अध्यक्ष वीरबहादुर लामाले जानकारी दिए । उनका अनुसार पथप्रदर्शक पोखरेल प्रहरीको नियन्त्रणमा छन् ।
सामागाउँ तिब्बत सीमानामा पर्ने गोरखाको गाउँ हो । अहिले हिउँ नपरेको र खुख्खा हावा चलिरहेकाले आगो फैलिरहेको वडा सदस्य मिङ्मार लामाले जानकारी दिए । हिजो राति आगो निभाउन सफल भए पनि आज बिहानदेखि आगो फेरि सल्केको थियो ।
आगो नियन्त्रणका लागि सामागाउँ प्रहरी चौकी र नामरुङ प्रहरी चौकीबाट प्रहरी टोली खटाइएको जिल्ला प्रहरी प्रमुख एसपी भोला रावलले जानकारी दिए । सम्पर्क हुन नसकेकाले विस्तृत विवरण पाउन नसकेको उनले बताए ।