भैरहवा : रुपन्देही अन्र्तगत नेपाल–भारत सीमानाकामा दुवै देशका सुरक्षाकर्मीले संयुक्त गस्ती थालेका छन् । सीमा क्षेत्रबाट हुने चोरी, तस्करी नियन्त्रण, मिचिएको सीमाक्षेत्र बढेको तनावलाई कम गर्दै सम्बन्ध प्रगाढ बनाउन नेपाल–भारतका सीमा सुरक्षाकर्मीहरुले संयुक्त गस्ती थालेका हुन् ।
रुपन्देही अन्तर्गत धकधई, मर्चवार, भैरहवा र लुम्बिनी क्षेत्रको दशगजामा संयुक्त रुपमा दुवै देशका सुरक्षाकर्मीहरु गस्ती गरिरहेका छन् । नेपालको सशस्त्र प्रहरी बल र भारतको सीमा सुरक्षा बल (एसएसबी) ले रुपन्देहीका सीमानाकामा संयुक्त गस्ती जारी राखेको सस्शत्र प्रहरी बल सीमा सुरक्षा कार्यालय पजरकट्टीका सस्शत्र प्रहरी निरीक्षक ताम्रजंग बस्नेतले जानकारी दिए ।
‘सीमामा संयुक्त गस्ती गर्दा अपराधमा कमी आउनुका साथै दुवै देशका सुरक्षाकर्मीबीच सम्बन्धसमेत मजबुद हुन्छ’, उनले भने । सीमामा संयुक्त गस्तीका क्रममा रोहिणी गाउँपालिका–७ मनोहरापुरस्थित स्तम्भ नं २०/५१४ देखि २१/५१५ को अनुगमन गरिएको थियो ।
नेपालतर्फबाट सस्शत्र प्रहरी बल नेपाल बोर्डर आउट पोष्ट पजरकट्टीबाट सस्शत्र प्रहरी नायव निरीक्षक डिलबहादुर घर्ती मगरको कमाण्डमा खटिएको ११ जना र भारतीय सीमा सुरक्षा बल २२ बटालियन कम्पनी (ए) बर्डर आउट पोष्ट भगवानपुरबाट प्रहरी नायव निरीक्षक प्रथम सिंहको कमाण्डमा ६ जनासहित १७ जनाको संयुक्त टोलीले गस्ती गरेको हो ।
सस्शत्र प्रहरी बल नेपाल बोर्डर आउट पोष्ट पजरकट्टी अन्र्तगत पिलर नम्बर ५१० देखि ५१६ पर्ने भएकोले सबै पिलरको अनुगमन गरिने सस्शत्र प्रहरी निरीक्षक बस्नेतले बताए । संयुक्त अनुगमनले चोरी निकासीको घटना कम हुनुको साथै दुवै देशका जनतामा सुरक्षाको प्रत्याभुति भएको प्रहरीको भनाई छ ।
प्रतिक्रिया दिनुहोस !
