काठमाडौं : पूर्वप्रधानमन्त्री तथा नेपाल कम्युनिस्ट पार्टीका अध्यक्ष पुष्पकमल दाहाल ‘प्रचण्ड’ले इतिहासले अहिलेको नेतृत्वलाई अग्नि परीक्षामा लिएको बताएका छन् । नेपाल शिक्षक माध्यमिक विद्यालय शिक्षक युनियन, नेपालको राष्ट्रिय भेलालाई शुक्रबार सम्बोधन गर्दै अध्यक्ष प्रचण्डले यस्तो बताएका हुन् ।
‘हामीले समस्याको समाधान गरेर संविधानको परिकल्पना अनुसार देशलाई समृद्धिको एउटा नयाँ यात्रा हुँदै समाजवाद उन्मुख राज्य तिर लैजान सक्ने कि नसक्ने भन्ने प्रश्न अगाडि छ’ प्रचण्डले भने ।
उनले आफूहरुलाई शिक्षामा देखिएका सबै प्रकारका समस्याको समाधान गर्ने अवसर प्राप्त रहेको बताउँदै सो अवसर नेपालले धेरै लामो संघर्ष र बलिदानपछि प्राप्त गरेको उल्लेख गरे ।
‘यति बेला थाती रहेका समस्याको समाधान भएनन् भने कहिले हुन्छन् भन्ने एउटा डरलाग्दो चित्र आउँछ । यो समस्याको समाधान हामीले पनि गरेनौं भने कसले गर्छ’, उनले भने, ‘यसको कल्पना पनि गर्न सकिन्न ।’
शिक्षकका समस्याको समाधान गर्न आफू प्रधानमन्त्री र शिक्षामन्त्रीसँग छलफल गर्ने उनको भनाइ छ । अध्यक्षले विकसित भनिने राष्ट्रले पनि शिक्षालाई नै उच्च प्राथमिकतामा राखेको बताए ।
प्रतिक्रिया दिनुहोस !
