काठमाडौं : त्रिवि शिक्षण (टिचिङ) अस्पताल महाराजगन्जमा पहिलोपटक कलेजो प्रत्यारोपण गरिएको छ । ३३ वर्षीया छोरीको कलेजो ५८ वर्षीय पितालाई प्रत्यारोपण गरिएको हो ।
ती व्यक्तिको स्वास्थ्य सामान्य छ । दाता र प्रत्यारोपण गरिएका दुवैजनालाई सघन उपचार कक्षमा राखिएको छ । उनीहरुलाई एक साताभन्दा बढी समय सघन उपचार कक्षमै राखेर उपचार गरिने अस्पतालले जनाएको छ ।
प्रा.डा. रमेशसिंह भण्डारीको नेतृत्वमा रहेको चिकित्सकको १६ घन्टा लगाएर प्रत्यारोपण गर्न सफल भएको हो । शुक्रबार बिहान आठ बजे सुरु गरिएको प्रत्यारोपण कार्य शनिवार मध्याह्न १२ बजे सकिएको भण्डारीले बताए ।
अस्पतालका कार्यकारी निर्देशक प्रा.डा. प्रेमकृष्ण खड्गाका अनुसार प्रत्यारोपणमा संलग्न नेपाली शल्यचिकित्सकलाई भारतको एपोलो अस्पतालका डा. निरभ गोयलले सघाएका थिए ।
खड्गाले पहिलो प्रत्यारोपण कार्य सफल भएकोमा खुसी व्यक्त गरे । ‘कलेजो प्रत्यारोपण कार्यलाई निरन्तरता दिने सोच बनाएका छौं । दाता भेटिएको अवस्थामा हरेक महिना कम्तीमा एक जनामा प्रत्यारोपण गर्ने योजना छ’, उनले भने ।
कलेजो प्रत्यारोपणको नेतृत्व गरेका डा. भण्डारीले अस्ट्रेलियामा विशेष तालिम लिएका थिए । डा. भण्डारीले पाँच वर्षदेखि प्रत्यारोपण कार्यलाई अघि बढाउन व्यक्तिगत पहल गर्दै आएका थिए ।
प्रत्यारोपण टोलीमा एनेस्थेसियातर्फ डा. अमित भट्टराई, डा. अनिल श्रेष्ठ, डा. पंकज जोशी, क्रिटिकल केयरमा डा. सुवास आचार्य, डा. प्रमेशसुन्दर श्रेष्ठ, चिकित्सक, नर्स एवं स्वास्थ्यकर्मी सहित झन्डै ५० जना संलग्न थिए ।
तत्कालीन स्वास्थ्यमन्त्री गगन थापाले प्रत्यारोपण कार्यको पूर्वाधारका लागि एघार करोड बजेट निकासा गरेका थिए ।
नेपालमा पहिलोपटक कलेजो प्रत्यारोपण कार्य भक्तपुरस्थित मानव अंग प्रत्यारोपण केन्द्रमा सुरु गरिएको थियो । ०७३ मंसिर २२ गते कलेजो प्रत्यारोपण सुरु गरिए पनि त्यसले निरन्तरता पाएको छैन ।
२५ लाखमै प्रत्यारोपण
कलेजो प्रत्यारोपण कार्य जटिल र खर्चिलो मानिन्छ । तर शिक्षण अस्पतालले भने न्यून खर्चमा प्रत्यारोपण गर्ने दाबी गरेको छ ।
कलेजो प्रत्यारोपणका लागि नेपालीहरू भारतमा जाने गरेका छन् । चिकित्सकका अनुसार भारतका अस्पतालमा झन्डै ५० लाख खर्च हुने गरेको छ । आवतजावत खर्च जोड्दा झन्डै ७५ हजारको हाराहारीमा खर्च हुन्छ ।
नेपालबाट बर्सेनि झन्डै ६० भन्दा बढी बिरामी प्रत्यारोपण गर्न भारत जाने गरेको अनुमान छ । तर शिक्षण अस्पतालले भने झन्डै २५ लाखमा प्रत्यारोपण गर्ने योजना बनाएको छ ।
प्रत्यारोपणमा अगुवाइ गरेका डा. भण्डारीले सरकारले उपचारमा सहुलियत दिए कमजोर आर्थिक अवस्थाका बिरामीलाई सहयोग पुग्ने बताए ।
कसरी बिग्रन्छ कलेजो ?
धुम्रपान एवं मद्यपान, हेपाटाइटिस बी, हेपाटाइटिस सी लगायतका कारणले कलेजो बिग्रने डा. भण्डारीले बताए ।
त्यस्तै कलेजोमा जम्ने बोसो ( फ्याटी लिभर) एवं अन्य संक्रमणका कारण पनि कलेजो बिग्रन सक्छ ।
प्रतिक्रिया दिनुहोस !
