रुकुम : बुधबार साँझ विद्यालयको पढाइ सकेर सावित्री र डिलमाया आफ्नै धुनमा घर फर्किरहेका थिए । रुकुम पश्चिमको मुसिकोटको मालिका माविमा कक्षा सकेर फर्किएका उनीहरु पहिरोले पुरिए ।
उनीहरुको उद्धार गर्ने कोही भएन । विद्यालयबाट घर फर्किने प्रतिक्षामा रहेका अभिभावकले १० वर्षीया सावित्री विक र १२ वर्षीया डिलमाया विकको शवमात्र भेटे ।
सावित्रीको डाक्टर र डिलमायाको इन्जिनियर बन्ने सपना पहिरोसँगै पुरियो । गाउँकै विकासका लागि निर्माण भएको सडककै कारण पहिरो झर्दा उनीहरुको ज्यान गएको हो । सावित्रीका बुबा डिलबहादुरले भने, ‘घटनास्थलमै छोरीको मृत्यु भइसकेको रहेछ । विकासका लागि बनेको सडकले हाम्रो परिवार नै खाइदियो ।’
गत वर्ष निर्माण भएको सडकमा पहिरो गएपछि दुबै बालिका पुरिएको र घटनास्थलमै मृत्यु भएको जिल्ला प्रहरी कार्यालय रुकुम पश्चिमका प्रमुख प्रहरी नायव उपरीक्षक सुमति खड्काले जानकारी दिए । उनीहरुको शव परीक्षणपछि आफन्तलाई बुझाइएको छ ।
प्रतिक्रिया दिनुहोस !
