राजविराज : गजेन्द्रनारायण सिंह अस्पताल राजविराजमा शनिबार गरिएको पीसीआर परीक्षणमा अन्तर्राष्ट्रिय क्रिकेट खेलाडी, शिक्षक र पुस्तक व्यावसायीसहित सातजना संक्रमित भएका छन् ।
गजेन्द्रनारायण सिंह अस्पतालको प्रयोगशालामा भएको परीक्षणअनुसार २५२ जनामध्ये सात जनाको रिपोर्ट पोजिटिभ आएको स्वास्थ्य कार्यालय सप्तरीले जनाएको छ ।
कोरोना संक्रमित हुनेमा राजविराज नगरपालिका– ५ का ३४ वर्षीय क्रिकेट खेलाडी, ६२ वर्षीय उनका बुवा र ६१ वर्षीया उनकी आमा, सोही वडा बस्ने मविव क्याम्पस राजविराजका आंशिक शिक्षक ४० वर्षीय पुरुष र उनका २५ वर्षीय भाञ्जा तथा राजविराज–७ का ५६ वर्षीय पुस्तक व्यावसायी र उनका २६ वर्षीय छोरा रहेका छन् ।
महोत्तरीको बर्दिवासस्थित पावनमिथिला होटलमा साउन १५ गते भएको समृद्धिको बैठकमा पुगेर फर्किएका क्रिकेट खेलाडीलाई ज्वरो, सर्दी लागेपछि चेकजाँच गराएका थिए । आंशिक शिक्षक र उनका भाञ्जाले उनीहरुको छिमेकी संक्रमित भएका कारण परीक्षण गराएका थिए भने पुस्तक व्यावसायी एवम् पत्रिकाका प्रकाशकले पनि शंका लागि चेकजाँच गराएका थिए ।
अग्नीसाइर कृष्ण सवरण र तिरहुत गाउँपालिका तथा शम्भुनाथ र हनुमाननगर कंकालिनी नगरपालिकाबाट संकलित गरिएका १७६ जनाको स्वाबको रिपोर्ट भने नेगेटिभ आएको छ । पछिल्लो पटक गरिएको ७६ जनाको स्वाबको परीक्षण गर्दा राजविराजका सात जनामा कोरोना संक्रमण देखिएको अस्पतालले जनाएको छ ।
शनिबार राति भएको परीक्षणको पुष्टि स्वास्थ्य तथा जनसङ्ख्या मन्त्रालयले आइतबार गर्ने बताइएको छ ।
प्रतिक्रिया दिनुहोस !
