वासिङटन: भारत र अमेरिकाबीचको सम्बन्ध पछिल्लो समय तिब्र बनेको बताइएको छ । अमेरिकी राष्ट्रपति जो बाइडेनको १ सय दिनको अवधि सम्पन्न हुँदै गर्दा वासिङटनस्थित बाइडेन प्रशासनले भारतसँगको सम्बन्धबारे प्रतिक्रिया दिएको हो ।
यस अवधिमा दुई देशबीचको सम्बन्धले विश्वव्यापी बृहत्तर साझेदारीलाई दर्शाएको अमेरिकी विदेश मन्त्रालयका प्रवक्ता नेड प्राइसले बताए । साथै पछिल्लो १ सय दिनको अवधिमा आफूहरु भारतसँगको सम्बन्धमा केन्द्रित रहेको पनि प्राइसले बताए ।
"पछिल्लो १ सय दिनको अवधिमा भारतमाथि चासो केन्द्रित गरिएको छ । राष्ट्रपति बाइडेनले पनि हिजो रातिको आफ्नो सम्वोधनको क्रममा भारतको चर्चा गर्नुभयो । र मलाई लाग्छ कि तपाइँ गहिरो साझेदारी र साझेदारीका लागि प्रतिवद्धता हेर्न सक्नुहुन्छ," प्राइसले पत्रकार सम्मेलनको क्रममा भनेका छन् ।
बाइडेनले यसबीचमा भारतीय प्रधानमन्त्री नरेन्द्र मोदीसँग समेत संवाद गरिसकेका छन् । साथै अमेरिकी अन्य उच्च अधिकारी र भारतीय अधिकारीहरुबीच पनि बारम्बार संवाद भएको छ ।
धेरै पटक भारतीय प्रतिनिधिमण्डलसँग आफूहरुले कुराकानी गरिसकेको र अमेरिकी प्रतिनिधि मण्डल वार्ताका लागि भारत पुगेको प्रसंग कोट्याउँदै प्राइसले दुई देशबीचको सम्बन्ध प्रष्ट्याउन खोजेका थिए ।
साथै अमेरिकाले भारतसँग बहुपक्षीय सन्दर्भमा र क्वाड मार्फत मन्त्री तहमा र पहिलो पटक नेतृत्व स्तरमा संवाद भएको प्राइसले बताए । साथै उनले भारतलाई जलवायुसँगै स्वास्थ्य सहयोग गर्नेबारे पनि उल्लेख गरेका छन् ।
प्रतिक्रिया दिनुहोस !
