विराटनगर: प्रदेश नं. १ को मोरङमा प्रतिनिधि सभातर्फको मतपरिणाम अनुसार सत्ता गठबन्धन अग्रतामा देखिएको छ ।
प्राप्त मतपरिणाम अनुसार मोरङका ६ मध्ये ४ निर्वाचन क्षेत्रमा सत्ता गठबन्धन अग्रतामा देखिएको छ।
मोरङको निर्वाचन क्षेत्र नं. २, ३, ५ र ६ मा गठबन्धनका दलले जित्ने सम्भावना उच्च देखिएको छ।
मंगलबार साँझ ५ बजेसम्मको प्राप्त मतपरिणाम अनुसार यी निर्वाचन क्षेत्रमा गठबन्धनका कांग्रेस र माओवादी केन्द्रका उम्मेदवार फराकिलो मतान्तरका साथ अग्रतामा छन् । निर्वाचन क्षेत्र नं. १ मा नेकपा एमाले र ५ मा स्वतन्त्र उम्मेदवारको पकड छ ।
प्राप्त परिणाम अनुसार मोरङ २ मा नेपाली कांग्रेसकी सुजाता कोईराला ४ हजार ३७० मतसहित अग्रतामा छन । उनलाई एमालेका ऋषिकेश पोखरेलले ४ हजार ३१३ मतसहित पछ्याईरहेका छन् । मोरङ ३ मा पनि कांग्रेसकै सुनिलकुमार शर्मा फराकिलो मतान्तरका साथ अग्रतामा छन् ।
आफ्ना प्रमुख प्रतिस्पर्धी एमालेका भानुभक्त ढकालभन्दा दोब्बर बढी मत उनले प्राप्त गरेका छन् ।
ढकालले २ हजार ९६ मत प्राप्त गर्दा शर्माले ४ हजार ९७ मत प्राप्त गरेका छन् । राप्रपा उम्मेदवार रेखा थापाले भने १ हजार २८८ मत प्राप्त गरेकी छन् ।
क्षेत्र नं. ४ मा भने नेकपा माओवादी केन्द्रका अमनलाल मोदीले २ हजार ७५४ को फराकिलो मतान्तरका साथ अग्रता कायम राखेका छन्। उनका प्रमुख प्रतिस्पर्धी एमालेका विनोद ढकालले ५ हजार ९३७ मत प्राप्त गर्दा मोदीले ८ हजार ६९१ मत प्राप्त गरेका छन् ।
क्षेत्र नं. ६ मा पनि कांग्रेसकै अग्रता देखिएको छ । सो क्षेत्रमा एमालेका लालबाबु पण्डितले २ हजार ७६८ मत ल्याउँदा कांग्रेसका डा. शेखर कोईरालाले ३ हजार ५४४ मत प्राप्त गरेका छन् ।
राप्रपाका यादव प्रधानले १ हजार ९४ मतसहित पछ्याईरहेका छन् ।
बाँकी रहेका निर्वाचन क्षेत्रमध्ये १ मा एमाले र ५ मा स्वतन्त्र उम्मेदवार योगेन्द्र मण्डलको अग्रता छ । क्षेत्र नं. १ मा एमालेका घनश्याम खतिवडा ३ हजार ८६२ मतसहित अग्र भागमा छन् । उनका प्रतिस्पर्धी कांग्रेसका डिगबहादुर लिम्बुले ३ हजार ९५ मत प्राप्त गरेका छन् । राष्ट्रिय स्वतन्त्र पार्टीका कमल बहादुर श्रेष्ठले १ हजार ७१५ मतसहित पछ्याईरहेका छन् ।
क्षेत्र नं. ५ मा माओवादीका शिवकुमार मण्डलको ह्याट्रिक रोक्दै स्वतन्त्र उम्मेदवार योगेन्द्र मण्डल फराकिलो मतान्तरका साथ अगाडि देखिएका छन् । प्राप्त मतपरिणाम अनुसार शिवकुमार मण्डलले ४ हजार ८१३ मत ल्याउँदा योगेन्द्रले ७ हजार २३६ मत प्राप्त गरेका छन् । जसपाका राजकुमार मण्डलले ४ हजार ५०७ मतसहित पछ्याईरहेका छन् ।
७ लाख २५ हजार ५३५ मतदाता रहेको मोरङमा भने ४ लाख ८७ हजार ४७ जनाले मतदान गरेका थिए । विराटनगरस्थित आर्दश माध्यमिक विद्यालयमा मोरङको निर्वाचन क्षेत्र नं. ४, ५ र ६ को मतगणना भईरहेको छ । क्षेत्र नं. १ को उर्लाबारी नगरपालिकाको कार्यालय, २ को रतुवामाईस्थित विश्वनाथ माध्यमिक विद्यालय र ३ को बेलबारीस्थित भगवती माध्यमिक विद्यालयमा मतगणना भईरहेको मुख्य निर्वाचन अधिकृतको कार्यालयले जनाएको छ ।
प्रतिक्रिया दिनुहोस !
