जनकपुरधाम: धनुषा प्रहरीले स्रोत नखुलेको रकमसहित एक हुण्डी कारोबारीलाई पक्राउ गरेको छ। ४ लाख ६ हजार १ सय १५ रुपैयाँसहित एकजना पक्राउ परेका हुन्।
पक्राउ पर्नेमा धनुषाधाम नगरपालिका ७ बस्ने ३८ वर्षीय जाबिर राईन रहेको प्रहरीले जनाएको छ। नगराईन नगरपालिका २ स्थित ईलाका प्रहरी कार्यालय लग्मा जटहीबाट प्रहरी बरिष्ठ नायव निरीक्षकको कमाण्डमा चेकिङमा खटिएको टोलीले भारतबाट नेपाल तर्फ आउँदै गरेको अवस्थामा पक्राउ गरेको हो ।
प्रदेश–२–०२–००४ प ७५३४ नम्बरको मोटरसाइकलमा सवार राईनलाई पक्राउ गरेको हो। शंका लागेर चेकजाँच गर्दा उनले बोकेको खैरो रंगको झोलाबाट स्रोत नखुलेको नेपाली ४ लाख ६ हजार ११५ रूपैयाँ बरामद भएको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक बेद प्रकाश गौतमले जानकारी दिए।
प्रहरीले राईनको साथबाट मोटरसाइकल १ थान, विभिन्न कम्पनीको मोबाइल २ सहित नियन्त्रणमा लिएर आवश्यक कारवाहीका लागि भन्सार कार्यालय जनकपुरमा पठाएको डीएसपी गौतमले बताए ।
प्रतिक्रिया दिनुहोस !
