लन्डन : लन्डनमा नेवारी परम्परा र संस्कृति झल्काउने मौलिक शैलीको नेवारी भोज (गुथि भ्वयः) गरिएको छ। पासा पुचः गुथि साउथ इस्ट लन्डनको आयोजनामा शनिबार वुल्लीचमा सम्पन्न भोजमा करिब तीन सय बेलायतवासी नेपाली स्वादिष्ट नेवारी परिकारहरूमा रमाएका छन्।
नेवा परम्पराअनुसार सञ्चालन गरिएको भोजका सहभागीले पलेंटी कसेर पातको टपरीमा विभिन्न ३२ परिकारको स्वाद लिएका थिए। साथमा परम्परागत शैलीमा तयार गरिएका ऐला र थों पनि थिए। भोजमा पस्किएका सबै परिकार र पेय पदार्थसमेत आयोजक पासा पुचः साउथ इस्टका सदस्यहरूले घरमै तयार गरेका थिए।
भोजको शुरुमा परम्पराअनुसार समाजका ज्येष्ठ सदस्यहरू एवम् विशेष अतिथिहरूलाई ‘नाय्’ (प्रमुख अतिथि) बनाइएको थियो। उनीहरूलाई धिमेबाजा र धूपबत्तीले स्वागत गर्दै भोज हलमा पुर्याइएको थियो। आसन ग्रहणपछि ‘नाय्’ हरूलाई फेटा बाँधेर सम्मान गरिएको थियो। भोजको परम्पराअनुसार ‘नाय्’हरूलाई खसीका टाउकोको आँखा, कान, जिब्रो, बंगारालगायतका विभिन्न अंगका परिकारहरू दिइएको थियो।
भोजको माध्यमबाट नेपालको मौलिक संस्कृति र परम्परा जस्ताको तस्तै बेलायतमा भित्रिएकोमा उनले खुशी व्यक्त गरे। भोजले सांस्कृतिक पुस्तान्तरणसमेतमा महत्वपूर्ण योगदान पुर्याएको भन्दै राजदूत आचार्यले आयोजकलाई धन्यवाद दिए।
स्थानीय रोयल ग्रीनवीच बरोका उपमेयर जीत रानाभाटले पासा पुचः यूकेले बेलायतमा नेपाली संस्कृतिको जगेर्नामा प्रशंसनीय कार्य गर्दै आएको बताए। परम्परागत शैलीमा आयोजित नेवाः भ्वय नयाँ पुस्तालाई मौलिक संस्कृति सिकाउने प्रभावकारी अवसर रहेको भन्दै उनले यसको निरन्तरताको लागि आग्रह गरे।
त्यस अवसरमा गायक योगेश्वर अमात्यले लन्डनमा पनि परम्परागत शैलीको नेवाः भोजमा रमाउन पाउँदा खुशी लागेको अनुभव सुनाए।
आयोजक पासा पुचः गुथि साउथ इस्ट लन्डनका अध्यक्ष माधवलाल श्रेष्ठले भोजमा सहभागी सबैलाई धन्यवाद व्यक्त गरेका थिए। बेलायतमा परम्परागत शैलीमा भोज तयार गर्नु सजिलो नरहेको तर परम्परा जोगाउने उद्देश्यमा संस्थाका सदस्यहरू एक भएर जुटेपछि वर्षेनी भोज सम्भव हुँदै आएको उनले बताए।
पासा पुचः गुथि यूकेका अध्यक्ष सुशिल प्रजापतिले बेलायतमा छैटौं पटक नेवा भ्वयः आयोजना गरिएको बताए। भोजमा युवा सहभागिता बढाउने लक्ष्यसहित युवालाई निःशुल्क प्रवेश दिएर स्वयम्सेवकका रुपमा परिचालन गरिएको उनले जानकारी दिए। भोजको संयोजन सत्य प्रजापतिले गरेका थिए भने ईश्वर महर्जन, कृष्ण वैद्य, सोहन सुवाल, राजु श्रेष्ठलगायतले परिकार व्यस्थापनमा सहयोग गरेका थिए।
बेलायतमा नेवा परम्परा र संस्कृति प्रवद्र्धनमा सक्रिय पासा पुचः गुथिले वर्षेनी म्हःपूजा, बिस्केट जात्रालगायतका सांस्कृतिक परम्परालाई निरन्तरता दिँदै आएको छ।
प्रतिक्रिया दिनुहोस !
