भोटेकोशीमा निर्माणाधीन जलविद्युत आयोजनाको ढलान भत्कियो, दुईजना पुरिए, १० को उद्धार

सिन्धुपाल्चोक : सिन्धुपाल्चोकको भोटेकोशी गाउँपालिका –४ मा रहेको इलेक्ट्रिक हाइड्रो पावरको ढलान भत्किँदा दुईजना मजदुर पुरिएका छन् भने १० घाइतेको उद्धार गरिएको छ । शुक्रबार दिउँसो २ बजे हाइड्रो पावरको ड्यामसाइडमा रहेको सुरुङ ढलान गर्ने क्रममा ढलान भाँसिएपछि घटना भएको सिन्धुपाल्चोक जिल्ला प्रहरी कार्यालयका प्रमुख प्रहरी उपरीक्षक सन्तोष खड्काले जनाए । 

सो घटनामा दुईजना पुरिएको र १० जनाको उद्धार गरिएको प्रहरीले जनाएको छ । ठाकुरबावा नगरपालिका– ३ का ३० वर्षीय रामदिन थारु र सोही नगरपालिका ५ का ३० वर्षीय सुमन थारु ढलानले पुरिएर बेपत्ता भएको प्रहरीले जनाएको छ ।

त्यस्तै नाम थर नखुलेको दुईजना पुरुषहरू ढलानमा च्यापिएको हुँदा उद्धार कार्य भइरहेको प्रहरीको भनाइ छ । उद्धार गरिएका १० जनालाई भने उपचारको लागि अस्पताल लगिएको छ । उद्धार गरिएकामध्ये सामान्य घाइतेलाई बाह्रबिसे प्राथमिक स्वास्थ्य केन्द्र र गम्भीर घाइतेलाई धुलिखेल अस्पताल लगिएको छ ।

घाइतेहरूको उद्धारका लागि इलाका प्रहरी कार्यालय कोदारी र बाह्रबिसेबाट प्रहरी निरीक्षकको कमाण्डमा २० जना, सशस्त्र प्रहरीबाट १५ जना र नेपाल आर्मीको १५ जना खटिएको जिल्ला प्रहरी कार्यालयले जनाएको छ । हाइड्रो पावरको ड्यामसाइडमा रहेको सुरुङ ढलान गर्दागर्दै भत्किएको हो । 

४० मेगावाट क्षमताको उक्त जलविद्युत आयोजनाको गत साउनदेखि निर्माण सुरू भएको हो।