क्यान्सर रोगको सचेतना फैलाउन युवाको भूमिका महत्त्वपूर्ण : तेजुलाल चौधरी

काठमाडौं : युवा तथा खेलकुद मन्त्री तेजुलाल चौधरीले क्यान्सर रोगबारे जनचेतना फैलाउन युवाहरूको भूमिका महत्त्वपूर्ण हुने बताएका छन्। नेपाल अर्बुद रोग निवारण संस्था (एनसीआरएस)ले आज काठमाडौंमा आयोजना गरेको जनचेतनामूलक र्‍यालीको उद्‍घाटन गर्दै उनले यस्तो बताएका हुन्।  

नेपालमा क्यान्सर रोगको रोकथामका लागि सरकारले आजबाट सुरु गरेको एचपीभी भ्याक्सीन अभियानलाई सफल बनाउन युवाहरूले भूमिका खेल्नुपर्ने मन्त्री चौधरीको भनाइ छ। 
 

संस्थाका केन्द्रीय अध्यक्ष महेश श्रेष्ठले क्यान्सर रोकथाममा सरकारको योजनाहरू सकारात्मक हुँदै गएकाले यसमा सबैको साथ आवश्यक रहेको बताए। उनले क्यान्सर रोगीहरूप्रति जिम्मेवार भएर व्यवहार गर्नु हामी सबैको दायित्व भएको बताए। विश्व क्यान्सर दिवसकै अवसर पारेर नेपाल अर्बुद रोग निवारण संस्थाले काठमाडौंका विभिन्न स्थानबाट उपचारका लागि भक्तपुर क्यान्सर अस्पताल जाने बिरामीहरूका लागि निःशुल्क बस सेवा सुरु गरेको छ। हालः काठमाडौंको रत्नपार्कबाट रिङरोड हुँदै बस भक्तपुर क्यान्सर अस्पताल पुग्नेछ।