स्याङ्जा : मोटरसाइकल चोरी गरेको आरोपमा २ जनालाई प्रहरीले पक्राउ गरेको छ ।
स्याङ्जाको पुतलीबजार नगरपालिका ३ ढडुवामा आफ्नै घर अगाडि पार्किङ गरी राखेको ग२४प ६९१२ नम्बरको मोटरसाइकलसहित कास्कीका २ जना पक्राउ परेको प्रहरीले जनाएको छ ।
पक्राउ पर्नेमा पोखरा महानगरपालिका–२३ पुम्दीभुम्दीका २९ वर्षीय जितु विक र पोखरा २२ घाँटीछिनाका १९ वर्षीय राम सुनार रहेको प्रहरी नायब उपरीक्षक हरिप्रसाद पौडेलले जानकारी दिए ।
ढडुवाका दिपकचन्द्र गौतमले आफनै घरमा पार्किङ गरी राखेको मोटरसाइकल बिहीबार राति हराएको भन्दै प्रहरीलाई खोजतलासका लागि निवेदन दिएका थिए ।
अस्थायी प्रहरी पोष्ट मट्टीखान स्याङ्जाबाट खटिएको प्रहरी टोलीले शुक्रबार साँझ फेदिखोला गाउँपालिका–१ नैखु अयरपानीबाट हराएको मोटरसाइकलसहित विक र सुनारलाई नियन्त्रणमा लिएको प्रहरीको भनाइ छ ।
दुवै जनालाई चोरीसम्बन्धी मुद्दा दर्ता गरी आइतबार अदालतबाट ५ दिनको म्याद थप गरी अनुसन्धान अघि बढाएको प्रनाउ पौडेलले जानकारी दिए ।
प्रतिक्रिया दिनुहोस !
