धादिङ : धादिङमा वनको जग्गा अतिक्रमण गरेर निर्माण गरिएको पक्की व्यावसायिक भवन भत्काइएको छ। डिभिजन वन कार्यालय धादिङले पृथ्वीराजमार्गअन्तर्गत बेनिघाट रोराङ गाउँपालिका-३ मा सार्वजनिक वन क्षेत्र मिचेर बनाइएको भवन डोजर प्रयोग गरी हटाएको हो।
डिभिजन वन कार्यालय धादिङका प्रमुख रोशना पोखरेलका अनुसार लामो समयदेखि विवादमा रहेको उक्त संरचना सर्वोच्च अदालतले २०७९ सालमै हटाउन आदेश दिएको थियो। अदालतको आदेशपछि सम्बन्धित पक्षलाई पटक-पटक सूचना तथा समयसीमा दिइए पनि अटेर गरिएपछि अन्ततः भवन भत्काइएको उनले बताए।
संरचना हटाउने कार्यमा जिल्ला प्रशासन कार्यालय धादिङ, जिल्ला प्रहरी कार्यालय, सशस्त्र प्रहरी बल तथा डिभिजन वन कार्यालयको संयुक्त टोली परिचालन गरिएको थियो।
डिभिजन वन कार्यालयका अनुसार सार्वजनिक तथा वन क्षेत्र अतिक्रमण गरेर निर्माण गरिएका संरचनाविरुद्ध आगामी दिनमा पनि निगरानी र कारबाहीलाई निरन्तरता दिइनेछ।
सबैभन्दा धेरै सामुदायिक वन रहेको धादिङमा यस्ता थुप्रै घर निर्माण भएका छन्।
प्रतिक्रिया दिनुहोस !
