न्यूयोर्कको सफोल्क काउन्टीले गर्‍यो नेपाली चेली ‘देवी प्रतिभा’ लाई सम्मान

अमेरिका : भारतमा आध्यात्म प्रवचनमा तेस्रो नम्बरमा कहलिएकी नेपाली चेली देवी प्रतिभालाई अमेरिकाको न्यूयोर्क राज्यको सफोल्क काउन्टीले बिशेष सम्मान गरेको छ । 

हामी नेपाली इन्टरनेशनलको आयोजना रिभिल इभेन्ट्स आईएनसीको सहकार्यमा न्यूयोर्कको वड्साइडमा क्रियापुत्री भवन र गुम्बा निर्माण गर्न स्रोत जुटाउन लगाइएको श्रीमद्भागवतको समापनमा सफोल्क काउन्टीले बिशेष सम्मानपत्रसहित सम्मान गरेको हो । मे १५ देखि १७ सम्म सञ्चालन भएको श्रीमद्भागवतमा उनले कथा वाचन गरेकी थिइन् ।

 ‘सुश्री प्रतिभाले सनातन धर्मको लागि विश्वव्यापी राजदूतको रूपमा भूमिका निर्वाह गर्नुभएको छ र आफ्नो सुन्दर प्रस्तुति मार्फत विश्वभरका अनगिन्ती हिन्दू–सम्बद्ध संस्कृतिहरूलाई एकीकृत गर्नु भएको छ । देवी प्रतिभाले आफ्नो जीवनका धेरै वर्षहरू हिन्दू र नेपाली समुदायका लागि आध्यात्मिक प्रवचन, कथा र प्रेरक भाषणहरूका माध्यमबाट समर्पित गर्नु भएको छ । यी कार्यक्रमहरूले आध्यात्मिकता, संस्कृति, भक्ति र सकारात्मक ऊर्जालाई जोड्दछन्–जसले आस्था, धर्म र संस्कृतिका बाधाहरूलाई पार गर्दछ’ सफोल्क काउन्टी व्यवस्थापक सामुएल गोन्जालेजले हस्ताक्षर गरिएको सम्मानपत्रमा उल्लेख गरिएको छ ।’

देवी प्रतिभा कम उमेरमा आध्यात्म अङ्गीकार गर्दै देशविदेशका धार्मिक कार्यक्रममा प्रवचनमा प्रखर बनिरहेकी छिन् । नेपालको काभ्रेपलाञ्चोक जिल्लाको मण्डनदेउपुर नगरपालिका–१० ज्वानेटारमा जन्मेकी उनले भारतको बृन्दावनमा संस्कृत व्याकरणमा आचार्यसम्मको अध्ययन छिन् । गीत संगीतमा पनि निपूर्ण छिन् । प्रवचनका क्रममा धार्मिक गीतसङ्गीतमा श्रद्धालु भक्तजनलाई छमछमी नचाउनसक्ने बिशेष कला छ ।

‘उहाँले यहाँ सम्मान पाउनु हामी सबै नेपालीले सम्मान पाउनु हो’, हामी नेपाली इन्टरनेशनलका केन्द्रिय अध्यक्ष नवराज केसीले भने, ‘उहाँले कथावाचन गरेको श्रीमद्भागवत भव्य बन्यो ।’