रौतहट : रौतहटमा सोमबार र आइतबार आएको हावाहुरीका कारण घर ढल्दा च्यापिएर वृन्दावन नगरपालिका–७ सखुअवा धमौरा गढी टोलमा एक महिलाको मृत्यु भएको छ । आफ्नै घरमा रहेका बेला हावाहुरीका कारण घरको ढल्दा स्थानीय ३५ बर्षीया फूलकुमारी यादव घाइते हुन पुगिन् र उनको उपचारका लागि गरुडास्थित बेटर अस्पताल पुर्याइएको भए पनि चिकित्सकले मृत घोषणा गरेको प्रहरीले जनाएको छ ।
बालबच्चाको बिचल्ली
घर भत्किएर आमाको मृत्युपछि चार सन्तानको बिचल्ली भएको छ । न त खाना छ, न त लगाउने कपडा अनि बास । अहिले बालबच्चा त्रिपालमुनि बसेका छ्न । उनीहरु बिचल्लीमा परेका छन् । यसैबीच हावाहुरी पीडित परिवारलाई सशस्त्र प्रहरीले सहयोग गरेको छ ।
बृन्दावन नगरपालिका-७ धमौरा, गढी टोलका बलिराम यादवको घर भत्किँदा श्रीमती फूलकुमारी यादवको समेत मृत्यु हुन पुग्दा बालबच्चाको बिचल्ली भएपछि सशस्त्र प्रहरी नेपाल सुरक्षा बेस क्याम्पको टोलीले लत्ताकपडा र खाधान्न सहयोग गरेको जानकारी सशस्त्र प्रहरीले दिएको छ । उता, हावाहुरीले कृषि बालीदेखि अन्य भौतीक संरचनामा क्षति पुर्याएपछि जिल्ला प्रशासन कार्यालयले लगत संकलन गर्न स्थानीय तहदेखि जिल्ला बिपद समितिलाई अघि सार्दै क्षतिको विवरण संकलनको कार्य अघि बढाएको जनाएको छ ।
हावाहुरीले विद्युतीय संरचना क्षति
नेपाल विधुत प्राधिकरण गौर शाखा अन्तर्गत विद्युतीय पोल र ट्रान्सफर्मरमा व्यापक क्षति भएको छ । सोमबार राति आएको हावाहुरीका कारण करिब ३० लाखको क्षति पुगेको र विद्युत आपूर्तिमा समस्या आएको गौर वितरण केन्द्रका प्रमुख इन्जिनियर धिरेन्द्रकुमार यादवले जानकारी दिए । हावाहुरीका कारण रौतहटको जिंगडिया पेट्रोल पम्पदेखि बिर्ता चौक आसपास क्षेत्रमा रहेको चपुर–गौर ३३ केभी विद्युत लाइनमा समेत ठूलो क्षति पुगेको छ । नेपाल विद्युत प्राधिकरण गौर वितरण शाखाका प्रमुख इन्जिनियर यादवका अनुसार २ वटा २ सय केभीको ट्रान्सफर्मर, २१ थान ११ मिटरका पोल र ९ थान ९ मिटरका पोलमा क्षति पुगेको छ ।
प्राधिकरणले विद्युत लाइन मर्मतका लागि प्राविधिक कर्मचारीहरू फिल्डमा खटिसकेको जनाएको छ । क्षतिग्रस्त पोल तथा तार मर्मत सम्पन्न हुन केही दिन लाग्ने भएकाले विद्युत सेवा पुनः निर्वाध रुपमा सञ्चालन हुने बताए । हावाहुरीबाट विद्युत संरचनामा ठूलो क्षति पुगेकाले गौर, गरुडा, चन्द्रपुर, मौलापुर लगायतका पालिका तथा आसपासका क्षेत्रमा विद्युत अवरोध हुन प्राधिकरण शाखाले जनाएको छ । विद्युत सेवा अवरुद्ध भएपछि स्थानीयवासी, व्यवसायी तथा सर्वसाधारणलाई दैनिक कामकाजमा समस्या भएको छ भने प्राधिकरणले मर्मत कार्य तीव्र रूपमा भइरहेको जनाउँदै सेवाग्राहीलाई धैर्य गर्न आग्रह समेत गरेको छ ।
प्रतिक्रिया दिनुहोस !
