एमालेले सबै दलसँग छलफल गर्ने 

काठमाडौः प्रमुख प्रतिपक्षी एमालेले समयसीमाभित्रै निर्वाचन गर्नका लागि सबै राजनीतिक दलसँग छलफल गर्ने निर्णय गरेको छ । पार्टी अध्यक्ष केपी ओलीको निवास बालकोटमा मंगलबार बसेको स्थायी समिति बैठकले यस्तो निर्णय लिएको हो ।

बैठकले समयसीमाभित्र निर्वाचन नभए संवैधानिक संकट आउने भन्दै अविलम्ब निर्वाचन गर्न सरकारसँग माग गरेको छ । ‘बैठकले २०७४ मंसिरअघि नै तीनै तहको निर्वाचन सम्पन्न गर्न र त्यसका लागि आवश्यक कानुनी तथा राजनीतिक वातावरण मिलाउन सरकारको गम्भीर ध्यानाकर्षण गराएको छ’, बैठकपछि प्रचार विभाग प्रमुख योगेश भट्टराईले भने ।

बैठकले यही फागुन २१ गतेदेखि आयोजना गर्न लागिएको मेची-महाकाली राष्ट्रिय अभियानको कार्यक्रम अनुमोदन गरेको छ । उक्त कार्यक्रमको उद्घाटन फागुन २१ गते झापाको काँकडभिट्टामा हुने तय भएको छ ।

अभियान सफल पार्न बैठकले पार्टी कार्यकर्ता, मातहत कमिटी, जनसंगठन र आमसमुदायलाई अपिल गर्दै सबै नेतालाई अनिवार्य सहभागी हुन निर्देशन दिएको छ । स्वतन्त्र विद्यार्थी युनियनको निर्वाचन र नेपाल पत्रकार महासंघको आसन्न निर्वाचनमा अवरोध पुर्‍याउन भएका तालाबन्दीप्रति एमालेले गम्भीर चिन्ता प्रकट गरेको छ । मुलुकमा कुनै पनि खालका निर्वाचन हुन नदिने षड्यन्त्रस्वरूप यस्ता क्रियाकलाप भएको ठहर गर्दै पार्टीले ती निर्वाचनका लागि सहज वातावरण बनाउन र तोकिएकै मितिमा निर्वाचन सम्पन्न गर्नसमेत ध्यानाकर्षण गराएको छ ।

समयसीमाभित्र निर्वाचन नभए संवैधानिक संकट आउने भएकाले अविलम्ब निर्वाचन घोषणा गर्न माग ।

बैठकले पोलिटब्युरो बैठकका एजेन्डा तय गरेको छ । पोलिटब्युरो बैठक बुधबारदेखि बस्दै छ । बैठकको सुरुमै अध्यक्ष ओलीले निर्वाचन नगर्न अनेक बहाना खोजिएको भन्दै यसका लागि आवश्यक परे पार्टीले दबाबमूलक अभियान सञ्चालन गर्नुपर्ने धारणा राखेको स्रोतले बतायो । उनले संविधान संशोधन प्रस्ताव असफल हुने भए छलफलका लागि संसद्मा ल्याउन दिनुपर्ने प्रस्ताव बैठकमा गरेका छन् । यस विषयमा बुधबारदेखि हुने पोलिटब्युरोको बैठकमा छलफल हुने भएको छ ।

ओलीले प्रधानमन्त्री पुष्पकमल दाहाल, नेपाली कांग्रेस सभापति शेरबहादुर देउवा, मधेसी मोर्चालगायतसँग भएको कुराकानीका विषयमा पनि जानकारी गराएका थिए । उनले अहिले मुलुकमा अतिवादी र विखण्डनकारी शक्ति हावी रहेको भन्दै निर्वाचनले मात्र त्यसलाई परास्त गर्नसक्ने धारणा राखेको प्रचार विभाग प्रमुख भट्टराईले बताए ।