स्याङ्जा : प्रांगारिक तरकारी तथा फलफूल खेती उत्पादन गर्ने लक्ष्यसहित चापाकोट नगरपालिकाले सेखामको सिममा प्रांगारिक पाठशाला कक्षा सञ्चालनमा ल्याएको छ । खाद्यवस्तु, तरकारी तथा फलफूलमा विषादी राखेर उत्पादन गर्ने क्रम बढेपछि चापाकोट नगरपालिकाले विषादीरहित कृषि उत्पादनमा जोड दिएको हो । प्रांगारिक कृषि उत्पादक किसानलाई विशेष सहयोग प्रदान गर्ने जनाउँदै नगरभित्र उत्पादित तरकारी तथा फलफूल उत्पादनमा प्रांगारिक मलको मात्र प्रयोग गर्ने जनाएको छ ।
नगरपालिकाले स्थानीय कृषक र कृषि उत्पादनलाई लक्ष्य गरी प्रांगारिक कृषि पाठशाला सुरु गरेको हो । पाठशाला उद्घाटन गर्दै नगरप्रमुख शिवकुमार गिरीले आधुनिक र व्यावसायिक कृषिका माध्यमबाट चापाकोट नगरपालिकालाई समृद्ध बनाउन सकिने बताउँदै प्रांगारिक कृषि, तरकारी तथा फलफूल उत्पादनमा लाग्नुपर्ने बताए । प्रांगारिक उत्पादनको उपयोगले मानव स्वास्थ्यलाई हित गर्ने बताउँदै प्रांगारिक कृषि उत्पादनमा पहिलो नगरपालिका बनाउने अभियानमा चापाकोटवासीलाई सहयोग गर्न आग्रह गरे ।
चापाकोट नगरपालिकाभित्र जहाँ जे उत्पाद हँुदै आएको छ सोहीअनुरूप विषादी प्रयोग नगरी तरकारी तथा फलफूल उत्पादन गर्ने र उत्पादित वस्तुलाई विशेष प्राथमिकता दिने नगरपालिकाले जनाएको छ । किसानलाई कुन समयमा कुन तरकारी लगाउने, कुन फलफूल लगाउँदा राम्रो उत्पादन लिन सकिन्छ भन्ने विषयमा कृषि प्राविधिक र कृषिविद्को सल्लाहमा सबै वडामा कार्यक्रम सञ्चालन गर्न लागिएको हो । नगरपालिकाअन्तर्गत बाँझो जमिनमा अब प्रांगारिक उपभोग्य तरकारी तथा फलफूल फलाइने भएको छ ।
फराकिला ठूला फाँट अन्न उत्पादनको भण्डार नै हो चापाकोट । यहाँ धान, मकै, तोरी, आलुलगायत फलफूल तथा तरकारी पनि उत्तिकै उत्पादन हुन्छ । ज्याग्दी चापाकोट नहर सिँचाइका माध्यमले खेतबारी सिञ्चित गर्ने नगरपालिका अर्को अभियानमा जुटेको नगर उपप्रमुख विमला श्रेष्ठले बताइन् ।
घरका लागि निर्वाहमुखी तरकारी उत्पादन गर्ने युवा कृषक निर्मल रानाले भने, ‘कुन समयमा कुन खेती लगाउँदा राम्रो उब्जनी हुन्छ, पाठशालाबाट सिक्नेछौं र व्यावसायिक तरकारी तथा फलफूल उत्पादनमा लाग्नेछौं ।’ सिमबाट सुरु भएको अभियान सबै वडामा विस्तार गरिने भएको छ । पाठशालामा कृषिविद् विके श्रेष्ठले प्रांगारिक तरकारी र फलफूल तथा कृषिजन्य वस्तु उत्पादन कसरी गर्ने, कुन मौसमका कुन–कुन बीउ लगाउने, कसरी स्याहार सुसार गर्नेलगायत विषयमा प्रशिक्षण दिनेछन् ।
मानवीय र वातावरणीय स्वास्थ्यका लागि प्रांगारिक खेती अभियानको ठूलो महŒव हुने प्रमुख प्रशासकीय अधिकृत रामचन्द्र अधिकारीले बताए । यस्ता कार्यलाई सबै नगरपालिका र गाउँपालिकाले सिको गर्नुपर्ने उनको भनाइ छ । ‘विषादी प्रयोग नगरी प्रांगारिक मलको मात्र प्रयोगले कृषिजन्य उत्पादन दिगो, स्वस्थ र टिकाउ हुन्छ’, उनले भने ।
...
प्रांगारिक पाठशाला उद्घाटन गर्दै चापाकोट नगरप्रमुख शिवकुमार गिरी । भवानी अधिकारी
प्रतिक्रिया दिनुहोस !
