‘एमाले-माओवादी एकता अवसरवादी गठजोड’
ओखलढुंगा : नेकपा (क्रान्तिकारी माओवादी) का महासचिव मोहन वैद्य‘किरण’ले एमाले र माओावदीबीच भएको एकीकरणलाई अवसरवादी गठजोडको संज्ञा दिएका छन् । प्रदेश नं. १ स्तरीय युवा प्रशिक्षण कार्यक्रममा सहभागी हुन ओखलढुंगा आएका नेता वैद्यले दक्षिणपन्थी अवसरवादी धारको एकता भएको टिप्पणि गरेका हुन् ।
नेकपा (क्रान्तिकारी माओवादी), जिल्ला समितिले आयोजना गरेको पत्रकार सम्मेलनमा महासचिव वैद्यले दुई पार्टीको एकीकरणबाट नेकपा बनेको नभई माओवादीको एमालेमा विलय भएको बताए ।
नेपालमा संसोधनवादी अवसरवादी धारको एकीकरण भएकाले अब क्रान्तिकारी कम्युनिष्टहरुको धुव्रिकरणमा नयाँ जनवादी धारको विकास गर्दै जनवादी क्रान्तिमा जाने आफ्नो कार्यदिशा रहेको वैद्यले प्रष्ट पारे ।
नयाँ जानवादी क्रान्तिका माध्यमबाट मुलुकमा समाजवाद हुँदै साम्यवाद स्थापना गर्ने बाटोमा अघि बढ्न दक्षिणपन्थी अवसरवादको विरुद्धमा संघर्ष गर्ने उनले बताए । उनले विप्लव र मोहनविक्रम सिंहसँग एकताका लागि छलफल भइरहेको बताए ।
संगठन सुदृढिकरण र जनपरिचालन अभियान अन्र्तगत प्रदेश स्तरीय प्रशिक्षणका लागि महासचिव वैद्य, नेता सिपी गजुरेलसहित एक दर्जन पोलिटब्यूरो र केन्द्रिय सदस्यसहित ओखलढुंगा आएका छन् । प्रशिक्षण शनिबारसम्म चल्ने जिल्ला सेक्रेटरी पर्वतले बताए ।