काठमाडौँ : पार्टी एकताको काम टुंग्याउन सत्तारुढ दल नेपाल कम्युनिष्ट पार्टी (नेकपा) को सचिवालय बैठक प्रधानमन्त्रीको सरकारकी निवास बालुवाटारमा बसिरहेको छ ।
एकता प्रक्रिया टुंगो लगाउन पटकपटक कार्यदलमाथि कार्यदल बनाई गृहकार्य गर्दासमेत प्रक्रिया लम्बिएपछि अध्यक्षद्वय केपी ओली र पुष्पकमल दाहाल आफैँले प्रस्ताव तयार पारी एकता प्रक्रिया टुंग्याउने तयारी थालेसँगै सचिवालय बैठक बसेको हो ।
बिहान १० बजेदेखि सचिवालय बैठक बसिरहेको हो । यसअघि एकता टुंग्याउन बनाइएका कार्यदल नै आपसी विवादमा रुमल्लिएपछि सचिवालयबाटै पार्टी एकता प्रक्रिया टुंग्याउने कोशिश थालिएको हो ।
यसअघि सचिवालय र स्थायी समिति बैठकमा प्रस्तुत गर्न अध्यक्षद्वय केपी शर्मा ओली र पुष्पकमल दाहालले एकताको प्रस्ताव तयार पार्न पटकपटक छलफल गरेका थिए ।
उनीहरूले आइतबारसमेत पार्टीका केही नेतालाई बालुवाटार बोलाई अनौपचारिक छलफल गरेका थिए । पछिल्लो कार्यदलका संयोजक रामबहादुर थापा र महासचिव विष्णु पौडेललाई पनि बालुवाटार बोलाई अध्यक्षद्वयले आइतबार छलफल गरेका थिए ।
दुई अध्यक्षले माघ २७ देखि नै तल्लो तह र जनवर्गीय संगठनको एकता प्रस्ताव तयार पार्न निरन्तर छलफल गरेका थिए । आइतबार पनि दुई अध्यक्ष छलफलमा बसेका थिए । छलफलपछि सोमबार सचिवालय बैठक बसेको हो । तर सचिवालयका कतिपय नेताले भने स्थायी समिति बैठकले बनाएको कार्यदलले बुझाएको प्रतिवेदनमाथि पहिले छलफल भएपछि मात्र अन्य प्रक्रियाबारे निष्कर्षमा पुगिने बताएका छन् ।
पार्टी एकता प्रक्रिया लम्बिएपछि कार्यकर्तामा निराशा बढ्दै गएको छ । नेकपाका दुवै तर्फका युवक, महिला र विद्यार्थी संगठनहरु पार्टी एकताको प्रतिक्षामा छन् । पार्टी एकता नटुंगिदा भातृसंगठनले आफ्ना गतिविधि पनि अघि बढाउन सकेका छैनन् ।
नेकपाका दुवै विद्यार्थी संगठनले संगठन एकता र स्ववियु निर्वाचन अनिश्चित बनेको भन्दै पार्टी नेतालाई ध्यानाकर्षण गराउन थालेका छन् । अखिल र अखिल क्रान्तिकारीका पदाधिकारीले आइतबार पार्टी कार्यालय धुम्बाराहीमा महासचिव विष्णु पौडेललाई भेटी स्ववियु निर्वाचन र संगठन एकताका विषयमा ध्यानाकर्षण गराएका थिए ।
अखिल अध्यक्ष नवीना लामा, अखिल क्रान्तिकारीका अध्यक्ष रन्जित तामाङ, उपाध्यक्षहरू सुरेन्द्र बस्नेत, विजय भट्टराई, महासचिव उत्तम अधिकारीलगायत नेताले संगठन एकतामा भइरहेको विलम्ब र स्ववियु चुनावका विषयमा रिपोर्टिङ गरेका थिए ।
उनीहरूले त्रिभुवन विश्वविद्यालयका उपकुलपतिले निर्वाचन मिति तोक्न नचाहेका कारण स्ववियु चुनाव अन्योलमा परेको बताएका थिए ।
प्रतिक्रिया दिनुहोस !
