काठमाडौः प्रधानमन्त्री पुष्पकमल दाहालले लोकतान्त्रिक आन्दोलनबाट प्राप्त उपलब्धि गणतन्त्र, संघीयता र धर्मनिरपेक्षतालाई उल्ट्याउने खेल हुँदा मुलुक गम्भीर दुर्घटनाको सँघारमा पुगेको दाबी गरेका छन् ।
उनले भने, ‘यो प्रधानमन्त्रीको भनाइ हो, मुलुक ठूलै दुर्घटनाको सँघारमा छ । लोकतान्त्रिक आन्दोलनबाट प्राप्त उपलब्धि गणतन्त्र, संघीयता र धर्मनिरपेक्षतालाई उल्ट्याउने खेलमा राष्ट्रिय तथा अन्तर्राष्ट्रिय शक्तिको चलखेल र धु्रवीकरण पनि व्यापक रूपमा अघि बढिरहेको छ ।'
पार्टी मुख्यालय पेरिसडाँडामा आयोजित २२ औं जनयुद्ध दिवसमा प्रधानमन्त्री दाहालले भने, ‘गणतन्त्र, संघीयता र धर्मनिरपेक्षतालाई सिध्याउन राष्ट्रिय तथा अन्तर्राष्ट्रिय शक्तिमात्र नभएर त्यसलाई बाध्यात्मक रूपमा स्वीकार्दै परिवर्तनकै कारण पटकपटक सत्तामा पुग्ने शक्तिसमेत छन् ।'
लोकतान्त्रिक शक्ति भन्ने कतिपय पार्टी र तिनका शीर्ष नेताहरूले लोकतान्त्रिक आन्दोलनले ल्याएको राजनीतिक परिवर्तनलाई अझै पनि आत्मसात गर्न नसकेका कारण मुलुक संक्रमणकालमै रहेको दाबी दाहालको छ । ‘जनयुद्धको अग्रज र मुलुकको प्रधानमन्त्रीका हैसियतमा मैले भन्नुपर्छ' भन्दै कार्यक्रममा दाहालले भनेका थिए, ‘बाध्यात्मक रूपमा परिवर्तनकारी शक्ति बन्न पुगेकाले परिवर्तनका एजेन्डालाई संस्थागत गर्ने असहयोगी बनेका छन् । यसका कारण आज मुलुक ठूलै दुर्घटनाको सँघारमा छ ।'
‘आन्दोलनकारी शक्तिहरूले जित्न र लोकतन्त्रलाई संस्थागत गर्न आन्दोलनका उपलब्धि गणतन्त्र, संघीयता र धर्मनिरपेक्षतालाई स्वीकार्न पनि माघ ७ भित्र स्थानीय, प्रान्तीय र केन्द्रीय संसद्को निर्वाचन हुनैपर्छ । अन्यथा मुलुक अतिवादी र साम्राज्यवादीका कारण ठूलै दुर्घटनामा पुग्छ', प्रधानमन्त्रीले भने ।
‘मूल प्रवाहबाट मधेसलाई अलग्याउने कार्यमा अतिवादी र साम्राज्यवादीबीच एकता भइरहेको छ । त्यस्तो एकतालाई चुनौती दिनसमेत मधेसीलाई मूल प्रवाहमा ल्याउने कार्यमा आफू नचुक्ने प्रण प्रधानमन्त्रीले दाहालले गरे । निर्वाचन नभए मुलुकमा ठूलै दुर्घटना र अराजकता हुने खतरामा रहेको उनको कथन थियो ।
‘शान्तिप्रक्रियाको १२ वर्षमा पनि हामी अझै संक्रमणकालबाट गुज्रनुको कारण तेस्रो पार्टीलाई जति अन्य पार्टीलाई गणतन्त्रप्रति अपनत्व नहुनु नै हो', उनले भने ।
जनयुद्धका माग र एजेन्डलाई संस्थागत गराउन पनि विभाजित माओवादीहरू एक ठाउँमा आउनुपर्नेमा उनले जोड दिए । दाहालले भने, ‘२३ औं जनयुद्ध दिवस मनाउने क्रमसँगै विभाजित माओवादीहरू एक हुनेछन् । माओवादी एकीकरण अब ढिलो हुँदैन ।'
प्रतिक्रिया दिनुहोस !
