बझाङ : बझाङमा प्रतिनिधिसभा र प्रदेशसभा सदस्य उम्मेद्वार निर्वाचनमा ५१ दशमलव ८८ प्रतिशत मत खसेको छ । एक लाख २२ हजार ३ सय ७६ मतदाता रहेको बझाङमा यसपटकको निर्वाचनमा ६३ हजार ४ सय ८९ मत खसेको हो ।
बझाङको प्रदेशसभा क का लागि ६१ हजार १ सय ६९ मतदाता रहेकोमा ३२ हजार ८ सय ३३ मत खसेको छ । जुन ५३ दशमलव ६८ प्रतिशत हो भने प्रदेशसभा ख का लागि ६१ हजार २ सय ७ मतदाता रहेकोमा ३० हजार ६५६ मत खसेको छ जुन ५२ प्रतिशत हो ।
एक प्रतिनिधिसभा सदस्य र दुई प्रदेशसभा सदस्य निर्वाचन क्षेत्र रहेको बझाङमा ७ जना प्रतिनिधिसभा सदस्यका लागि र ६ जना प्रदेशसभाका लागि चुनावी मैदानमा रहेका छन् । छिटफुट घटना घटे पनि बझाङमा निर्वाचन शान्तिपूर्ण ढंगले सम्पन्न भएको जिल्ला निर्वाचन कार्यालय प्रमुख विमलप्रसाद गौतमले बताएका छन् । हालसम्म बझाङका ११ वटा स्थानीय तहका १ सय ३० मतदान स्थलको मत पेटिका सदरमुकामस्थित जिल्ला अदालत मतगणनास्थल पुर्याइएको छ ।
बाँकी साइपाल गाउँपालिकाको विकट ५ मतदानस्थलको मतपेटिका हेलिकोप्टर र पैदलबाट सदरमुकाम चैनपुर ल्याउने पहल भइरहेको प्रमुख जिल्ला अधिकारी बाबुराम अर्यालले बताए । उनका अनुसार आज बेलुका मतपेटिका पुगेपछि सर्वपक्षीय बैठक बसेर मतगणना सुरु हुनेछ ।
प्रतिक्रिया दिनुहोस !
